PARTUTURAN

la angka ulaon pesta di Adat Batak ingkon parbinoto do sude tutur, tondong, keluarga, famili, jala ingkon gokhonon do nasida. Jotjot do ro sarita molo ndang jinou manang ndang ginokhon famili/keluarga tu ulaon pestaniba.

Ala ni i naeng ma ingkon tangkas botoon jala parrohahonon songon dia partording ni partuturon i asa unang gabe hona sarita iba, jala asa gabe denggan angka ulaon i.

Di parngoluon siapari ni hita halak Batak, partuturon i do ondolan ni falsafah ni parngoluon i, laos partuturon i do na songon tiang partunggul ni pardomuan parmudaron jala laos partuturon i do na manontuhon sikapta maradophon dongan na humaliang hita.

Tolu bagian bolon do ojahan ni partuturon, jala laos i do na ginoaran Dalihan na Tolu. Hata ni natuatua mandok Somba marhula hula, Manat mardongan tubu, Elek marboru, Poda on ma ingkon tangkas parrohahononta.

Tiniptip sanggar bahen huruhuruanJolo sinungkun marga asa binoto partuturan.

Hau antaladan parasaran ni binsusur. Sai tiur do pardalanan molo sai denggan iba martutur.

Dongan Sabutuha (Dongan Tubu)

DigoariNa Saripe ima:

  1. Haha dohot anggina na martinodohon pomparan ni sada ama.
  2. Haha dohot anggi ni ama (na martinodohon) pomparan ni sada sada ompung dohot pomparanna.
  3. Haha dohot anggi ni ompung (na martinodohon) dohot pomparanna.

Digoari Namarompuompu ima:

  1. Haha dohot anggi ni amang ni Ompung namartinodohon dohot pomparanna
  2. Haha dohot anggi ni ompung na martinodohon dohot pomparanna
  3. Pomparan ni Ompu Parsadaan di sada marga.
  4. Pomparan ni Ompu Parsadaan di sada marga na mardongan Tubu dohot pomparanna.

Digoari Dongan Saina ima:

  1. Asing marga alai sada ina.
  2. Dongan Marpadan Mangihuthon padan ni Ompu na parjolo i. Umpamana: Dongan Sapadan Turnip, Dongan Sapadan Siallagan.

Digoari Dongan Sahuta

Nang pe asingasing marga, ai solhot partubu solhotan do parhundul.

Falsafah ni pardongan sabutuhaon

Manat ma ho mardongan sabutuha molo naeng sangap ho. Tampulon aek do na mardongan sabutuha. Tali papaut tali panggongan. Tung taripar laut, sai tinanda do dongan.

Digoari Parboruon

Digoari Boru Tangkas

  1. Lae, (hamulian ni iboto niba)
  2. Hela, (hamulian ni boru niba)
  3. Amang-boru, (hamulian ni namboru niba)

Digoari Boru natuatua

  1. Lae, hamulian ni iboto ni Ompu suhut dohot pomparanna.
  2. Pomparan ni Namboru ni Ompu saluhut
  3. Pomparan ni boru ni Ompu Parsadaan di sada marga.
  4. Boru na gojong (nunga boru hian sian Ompu) Jala laos sahuta dohot hula-hula.
  5. Boru di ampuan i ma na ro sian na asing jala jinalo niampuan di huta niba
  6. Boru ni sude dongan sabutuha dohot dongan tubu.

Digoari Bere/Ibebere Ianakhon (tubu ni iboto)

  1. Ianakhon (tubu ni Namboru)
  2. Pomparan ni iboto ni Ompung
  3. Boru sian Pariban Hela, hamulian ni boru ni Pariban
  4. Lae, hamulian ni boru pomparan ni pariban ni ompung.
  5. Boru na Pulik marga Boru ni don gan saina
  6. Boru ni dongan marpadan

Falsafah ni parboruan

Elek ma ho marboru molo naeng ho sonang. Bungkulan do boru (sibahen pardameon/pardomuan). Durung do boru, tomburan hula hula (sipanumpahi do boru tongtong di Hula-hula). Unduk do marmeme anak laos unduk do marmeme boru (dos do holong ni roha di anak dohot di boru).

Falsafah taringot tu bere

Amak do rere, anak do bere. Dangka do dupang, ama do tulang. Hot pe jabu i, sai tong do i margulanggulang. Tung sian dia pe mangalap boru bere i, sai hot do i boru ni tulang.

Digoari Hula Hula

Na masuk tu horong Hula-hula

  1. Hula-hula Tangkas Tunggane (Lae) iboto ni pardihuta niba.
  2. Simatua (Amang ni pardihuta niba)
  3. Tulang, iboto ni Inang niba
  4. Haha anggi ni Simatua niba
  5. Ompu bao (Amang ni Simatua niba)
  6. Simatua ni Amang niba dohot pomparanna
  7. Bona Hula/Bona Tulang Simatua ni Amang niba
  8. Tulang ni Ompu Suhut
  9. Bona ni Ari Hula-hula ni Amang ni Ompu suhut
  10. Bona ni Ari nama ginoaran sude Hula-hula na di ginjang ni i.
  11. Simatua ni Ompu Parsadaan dina sandangka marga.
  12. Simatua ni Ompu Parsadaan di sada marga.
  13. Tulang Rorobot Tulang ni Pardihutaniba
  14. Tulang ni Inang Pangintubu (Hula-hula Simatua ni Amang niba)
  15. Sude Hula-hula ni Hula-hula (Boru ni angka on ma na nidokna Boru ni Tulang na so boi olion)
  16. Laos Hula hula niba do etongon sude Hula-hula ni Dongansabutuha.

Falsafah taringot tu Hula-hula

Asa tongtong iba ingot somba marHula-hula. Na mandanggurhon tu dolok tu iba molo basa mangalehon tu Hula-hula, lapatanna sai marlipat ganda do pasupasu jaloon (sian Tuhanta) molo basa iba marHula-hula. Obuk do jambulan na nidandan bahen samara. Pasupasu na mardongan tangiang ni Hula-hula mambahen marsundut sundut soada mara. Nidurung situma, laos dapot porapora, pasupasu na mardongan tangiang ni Hula-hula na pogos boi gabe mamora.

Goar-Goar Ni Partuturon Jala Aha Jouhononhon

Molo baoa iba dohonon ma:

  1. “Amang” tu Ama pangintubu
  2. “Amangtua” tu sude haha/parhahaon ni Amang niba siala marga dohot siala parparibanon, jouhonon Amangtua alai bo do holan Amang sambing.
  3. “Amanguda” tu sude anggi/paranggion ni amangniba siala marga dohot siala parparibanon, jouhonon “Amanguda” alai laos boi do holan “Amang” sambing.
  4. “Hahang” (angkang) tu sude baoa na tumodohon iba anak ni amanguda Amangtuaniba, jouhonon “Angkang”.
  5. “Anggi” tu sude baoa na tinodohonniba, jouhonon “Anggi”.
  6. “Haha doli” tu sude baoa pomparan ni angka ompu na tumodohon ompuniba, 7 (pitu) sundut di ginjang na gabe panise niba di angka ulaon Adat, jouhonon “Angkang Doli”.
  7. “Anggi Doli” tu sude baoa pinompar ni angka ompu na tinodohon ni ompuniba hirahira 7 (pitu) sundut di ginjangna na laos boi gabe panise di ulaon Adat, jouhonon “Anggi Doli”.
  8. “Ompung” tu Amang ni Amangniba dohot tu sude amang ni amangtua dohot amanguda jouhonon “Ompug Doli” manang holan “Ompung”.
  9. “Amang mangulahi” do dohonon Amang ni Ompungniba, jouhonon “Amang”
  10. “Ompung mangulahi” do dohonon Ompung ni Ompungniba, jouhonon “Ompung”.

Tu Pardihuta be:

  1. “Inang”, jouhonon tu inangniba.
  2. “Inangtua”, jouhonon tu inangtua.
  3. “Inanguda”, jouhonon tu inanguda.
  4. “Angkangboru”, jouhonon tu angkang.
  5. “Anggiboru”, jouhonon “inang”.
  6. “Ompung” (Ompung boru) jouhonon “Ompung” “Ompung boru”.
  7. Inang mangulahi do dohonon tu na binuat nit Amang ni Ompung jouhonon “inang”.
  8. Ompung boru mangulahi do dohonon ni ompung, jouhonon “Ompung”.

Tu angka Parboruon:

  1. Hela tu na mangalap boruniba dohot boru ni haha angginiba, jouhonon “Amang Hela”.
  2. Lae tu Amang, Amangtuaniba, jouhonon “Lae”.
  3. Ito tu inang, inangtua dohot jouhonon “Ito”.
  4. Lae tu na mangalap ibotoniba, jouhonon “Lae”.
  5. Amang boru, tu na mangalap iboto ni amangniba, jouhonon “Amangboru”.
  6. “Namboru” tu iboto ni amangniba jouhonon “Namboru”.
  7. Lae tu anak ni namborunia jouhonon “Lae”.
  8. Ito tu boru ni amangboruniba, jouhonon “Ito”.
  9. Amangboru, tu haha anggi ni amangboruniba, jouhonon “Amangboru”.
  10. Lae, tu Amang ni amangboruniba, jouhonon “Lae”.
  11. Ito, tu inang ni amangboruniba, jouhonon “Ito”.
  12. Bere, tu haha anggi dohot iboto ni helaniba, jouhonon “Bere”.
  13. Bere, tu anak dohot boru ni ibotoniba, jouhonon “Bere”.
  14. Bere, tu ito ni amangboruniba, jouhonon “Bere”.

Tu angka ParHula-hulaon Molo baoa iba dohonon ma:

  1. Amang tu Simatua doli, tu Amangtua dohot Amanguda ni Tungganeboruniba, jouhonon “Amang”.
  2. Inang tu Simatua boru, tu inangtua dohot tu inang inanguda ni Tungganeboruniba, jouon “Inang”.
  3. Tunggane (Lae) tu iboto ni Tungganeboruniba, jouon “Tunggane”.
  4. Inang bao, tu na nialap ni Tungganeniba, jouon”Inang” (besan)
  5. Tulang Naposo, tu anak ni Tunggane niba, jouon “Tulang”.
  6. Nantulang Naposo, tu na nialap ni Tulang Naposo niba, jouhon “Nantulang”.
  7. Ompung tu amang dohot tu inang ni Simatua niba, jouon “Ompung”.
  8. Tulang tu iboto ni inang niba jouhonon “Tulang”.
  9. Nantulang tu na nialap ni Tulang niba jouon, “Nantulang”.
  10. Ompungbao tu natoras ni inang niba, jouon “Ompung”.
  11. Tulang Rorobot tu tulang ni na nialap niba dohot tu tulang ni inang niba.
  12. Tulang Rorobot tu sude Haluhula ni Hula-hula.
  13. Bona Tulang manang Bona Hula apala tu Hula-hula ni Ompung niba.
  14. Bona ni Ari tu Hula-hula ni Amang ni Ompu Suhut niba.
  15. Bona ni Ari nama dohonon tu sude di ginjang ni huruf n.

Siingoton

  1. Holan baoa do na marlae, martunggane, martulang naposo dohot marnantulang naposo.
  2. Mardomu tusi holan boruboru do mareda, maramang naposo dohot marinang naposo.

Tambahan Siingoton

  1. Dongan Tubu atau Dongan Sabutuha yaitu satu marga.
  2. Boru, yaitu marga-marga yang kawin dengan pihak anak perempuan.
  3. Hula-hula yaitu marga-marga dari pihak orangtua isteri. Ditambah dengan unsur keempat.
  4. Sihalsihal yaitu teman-teman sejawat/sepergaulan, Dongan Sahuta, Raja Huta dan Raja Adat.

Referensi & Daftar Pustaka:

  1. https://simarmata.or.id/
  2.  https://tanobatak.wordpress.com
  3. https://www.obatak.id/
  4. https://www.tobatabo.com/