PANDUAN ADAT ULAON UNJUK

ULAON SILAS NI ROHA

Rumang Ni Siulaon Mulai Sian Mangarangrangi sahat tu Ulaon Unjuk /Pasahat Adat Na Gok Pardongansaripeon,

Ulaon Unjuk Pardongansaripeon

Pangantusion

  • Marhata sinamot (ulaon unjuk), i ma puncak ni ulaon paradaton di na pamulihon boru manang pangolihon anak. Angka rumang dohot pangkataion di ulaon i dipatupa do di buku on songon pegangan di hita. Namarhata sinamot di buku on ima namarhata sinamot na dipasada dohot pesta unjuk dung sidung pamasu-masuon sian gareja, songon naung somal taida jala taulahon di Jakarta dohot nahumaliangna. Namarhusip (mangarang-rangi) ndang na marhata sinamot dope. Alai, gabe sada keputusan dos ni roha ni parboru dohot paranak do i siboanonna di na marhata sinamot. Nian muse molo tarimangi do rohanta, gabe songon sandiwara nama angka panghataion di na marhata sinamot i. Alana, sude ruhut dohot rumang ni angka ulaon nungnga sian dos ni roha ni parboru dohot paranak. Molo tung pe mardalan pinggan panungkunan jala masitariasan angka panghataion, songonna pahantushon nama i jala asa tung tangkas dibege angka tutur loloan natorop, lumobi sian angka hula-hula dohot angka tulang ni parboru dohot paranak. Hombar tu si, sangat berperan ma di son parhata (parsinabul) ni kedua pihak asa mangolu jala uli tarida angka ruhut ni panghataion, songoni di angka elek jala somba maradophon hula-hula dohot tulang, manat di namardongan tubu, dohot di angka ruhut ni partuturan.
  • Marhata somba ni uhum somba ni adat marhite-hite sinamot, songon naung pinatorang, on ma songon puncak ni ulaon adat-paradaton pangolihon anak manang pamuli boru, di ulaon alap jual manang taruhon jual. Molo tung pe dipatupa ulaon marhata sinamot andorang so pamasu-masuon, manang songon nasomal laos di ari ni unjuk (pesta), ianggo taringot tu rumang dohot ruhut ni panghataion hira dos do i. Sai jolo marsipanganon do biasana, dungi marbagi jambar asa ditorushon tu na marhata sinamot. Dung sidung mangan angka tutur, dipungka ma ulaon adat-paradaton. Jala tangkas taboto andorang so marsipanganon hian, nungnga dipasahat paranak tu parboru tudu-tudu ni sipanganon namarsaudara, boi do i namarmiak-miak manang lombu sitio. Suang songon i parboru, nunga pasahathon dekke tu pihak paranak. Alai porlu pinatorang di son saotik taringot tu ulaon marhata somba ni uhum somba ni adat marhite-hite sinamot na dipatupa jala dipasada dohot ulaon pesta unjuk, khususna ma i taringot di ulaon di alaman manang di gedung pertemuan.

Pangantusion Naringkot Sibotoon dohot Siingoton Di Ulaon Adat Paradaton ima;

  1. Molo ulaon di alap jual (ulaon di alaman ni parboru), parboru dohot kedua pengantin, suang songon i dohot paranak rap masuk ma tu gedung pertemuan jala masing-masing hasuhuton hundul ma di inganan naung ditontuhon. Pihak parboru ma naparjolo manggorahon angka horong ni hula-hulana, asa masuk nasida tu gedung jala tangkas do i dijalo di ruhut paradaton.
  2. Molo Ulaon di taruhon jual lapatanna ulaon i di alaman (huta ni paranak). Mardomu tusi boi ma dongan tubu, boru dohot tutur na ginokhon ni paranak i langsung masuk tu gedung pesta kecuali horong hula‑hula/ tulang ni nasida. Alana hira songon huta/alaman ni paranak i do gedung i. Dung hundul be nasida masuk ma pengantin dohot rombongan ni suhut. Dijolo ma pengantin dohot pendampingna, ihut ma natoras ni pangoli dohot si solhot ni paranak. Dung jumpang tingkina di gorahon protokol ni pihak paranak ma asa masuk Horong ni hula-hula ni paranak, suang songon i di ruhut adat-paradaton (parboru mamboan boras sipir ni tondi dohot dekke). Alai sebagian sian boras i dipapulik do deba asa adong pangkeonna di ulaon paulak une (maningkir tangga).

Ulaon Unjuk Nasomal Masa Di Jabodetabek

  • Parjolo ma sian hula-hula natoras ni namagoli, dungi tu tulang, tulang rorobot, hula-hula namarhaha maranggi, dungi tu hula-hula naposo, ima hula-hula ni ianakkon ni natoras ni pangoli manang hula-hula ni haha ni pangoli angka naung sohot. Dung sidung i dijou protokol ni paranak ma asa masuk hula-hula (ima parboru). Masuk ma nasida, di barisan parjolo ma natoras ni boru muli. Mangihut ma muse na mamboan tandok bolon dohot na mamboan dengke. Na mamboan tandok bolon, i ma (paniaran ni haha manang anggi manang parumaen ni pihak parboru). Mangihut ma muse haha‑anggi dohot sisolhot ni nasida, ama di sabola siamun, ina di sabola hambirang huhut manghunti tandok. Sude nasida manghadang ulos di abara siamun. Masuk ma nasida rnarudur dohot renta. Na mamboan dengke di pudi ni na namboan tandok bolon.
  • Dung masuk rombongan ni par boru i, di gorahon protokol ni parboru ma asa masuk hula‑hula/tulang nasida.
  • Dung dapot hita lapatan dohot pangantusion taringot tu rumang ni ulaon taruhon jual i, saonari masuk ma hita tu contoh simulasi, hira songonon ma teknis pelaksanaan na:

Masisisean/masisungkunan;

Hatani Napasahat Tudu-tudu Ni Sipaganon i, Hira Songononma:

Protokol ni Paranak:
“Di hamu hula-hula nami raja i (didok margana), parjolo ma tapasahat hamauliateon ni rohanta tu Amanta Debata Pardenggan Basa I, disiala asi dohot holong ni rohaNa, naung mangiring-iring hita jala mangaramoti hita sahat tu tingkion, boi hita pajumpang bohi na marhula marboru dibagasan hahipason dohot las ni roha.
Raja nami, diharoro nami ditingkion, ima songon naung taboto, di naung rap hita paborhathon jala mangudurhon anak dohot boru ni huria i, tu bagas joro ni Tuhannta, laho manjalo pasu-pasu parbagason marhite-hite naposoNa, ima anak nami na gabe hela muna dohot boru muna nagabe parumaen nami.
Asa dilas niroha nami ditingkion, di naung saut nasida manjalo pasu-pasu pardongan saripeon, ima anak dohot parumaen nami, di ari na uli di bulan na denggan ditaon parasianon, disangkap roha nami, asa laos ditingkion ma nian udutan nami pasahaton somba ni adat (adat nagok) tu hamu hula-hula nami, asa dohot nang hamu hula-hula nami mamasu-masu anak dohot parumaen nami. Rap mangido hita di tangiangta anggiat tibu nasida togu marurat tu toru, tongam mardangka tu lambung, jala jagar marbulung tu ginjang.
Dison ro do hami pamoruon muna mandapothon hamu, pasahat tudu-tudu ni si panganon na marsaudara, tudu-tudu ni panggabean parhorasan ma on rajanami. Asa songon hata ni si tua-tua ma dohonon; Bagot na marhalto ma natubu di robean; Horas ma hamu na manjalo, horas di hami namangalean. Botima!”

(diolophon angka natorop).”

Hata Pasahat Dekke, Songononma Didok Parboru:

Protokol ni Parboru:
Di hamu raja ni pamoruonnami, asa dos tuatna dos nangkokna, mangarade ma hamu!
Di son hupasahat hami tu hamu dekke simudur-udur, dekke sitio-tio, dekke sahat.
Asa sai mudur-udur ma hamu tu dolok tu toruan, asa anggiat mangudurhon hagabeon, mangudurhon parhorason ulaonta di tingkion, udur nang angka parsaulian songoni nang angka pansamotan.
Sai anggiat ma tio parnidaan muna, tio angka pancarian, tio angka ngolu-ngolu dohot mual inumonmuna. Sahat ma tutu angka nauli nadenggan jaloon muna pamoruon nami, ditumpak Amanta Namartua Debata. Ia tu dolok hamu dapotan jampalan nalomak, tu toruan hamu dapotan mual na tio.
Asa didolok ma parbubuan, di toruan ma partanggalan, sai dapot ma dihamu naniluluan, songoni na jinalahan.
Lomak ma silinjuang, lomak sobinaboan, asa tudia pe hamu mangalangka disi ma hamu dapotan pangomoan.
Sahat ma tutu ulaontaon, mardalan dohot denggan, lelengma hita mangolu, sahat hita tu panggabean, sahat tu parhorasan. Botima. (diolophon natorop).”

Protokol ni Parboru:
“Ala hamu do napatupa sipanganon, ba hamuma raja ni boru mambahen tangiang!”

Protokol ni Paranak:
”Nauli Rajanami”

  • 🙂 Sahalak sian paranakma mambaen tangiang sipanganon. Dung martangiang mangan i, didok Protokol Paranak ma hira songonon:

Protokol ni Paranak:
”Sitip si gompa-golang pangarahutna; Tung Songoni pe natupa sai godang ma pinasuna. Marjomut ma hita!”

  • 🙂 Tingki marsipanganon, borhat do suhut parboru dohot paranak mandapothon angka tuturna songon patamahon, pasangaphon nasida di tingki namangan dope. Alai laos di namangan i, mardalan do sulang-sulang sian pihak paranak tu horong ni parboru. Jala tangkas do i digorahon paranak melalui protokol nasida.

Protokol ni Paranak:
“Di hamu saluhutna hula-hulanami, naeng ro ma hami pasahathon sulang-sulang natabo. Asa manumpak ma sahalamu dihami pamoruonmuna jala namasu-masu ma Tuhanta di hita saluhutna. Lasma rohamu rajanami. Botima.”

  • 🙂 Laos borhat ma pihak paranak pasahathon sulang-sulang tu parboru.
  • 🙂 Hira di tingki nasatongkin i, dipasangap protokol parboru dohot paranak ma angka tutur sian pihak nasida ganup taringot tu tudu-tudu ni sipanganon dohot dekke naung nijalo nasida (sian pamoruan/hula-hula) jala didok protokol parboru dohot paranak ma hira songonon:

Protokol ni Parboru:
”Dihita namardongan tubu suang songoni boru dohot bere, molo tung dijoloni hasuhuton pe tudu-tudu sipanganon naung pinasahat ni paromoruanta dohot dekke naung tajalo sian horong ni hulahula dohot tulangta naung rap manjalo do hita di si jala tahalashon ma i.”

Protokol ni Paranak:
”Dihita na marodongan tubu suang songoni boru dohot bere, molo tung di jolo ni hasuhuton pe dekke naung i pasahat hula-hula ta dohot tulangta naung rap manjalo do hita di si jala tahalashon ma i.”

  • 🙂 Ala adong di jalo paranak dohot parboru dekke siuk sian horong hula-hula dohot tulang, denggan ma nian asa digorahon dekke siuk na ni pasahat ni horong hula-hula tu nasida. Hira songon ma hatana.

Protokol ni Parboru:
”Hujalo hami do dekke siuk sian hula-hula dohot tulang nami nahuparsangapi hami

  • 🙂 Didok margana jala digorahon sada-sada.

Mauliate godang ma hupasahat hami tu hamu hula-hula dohot tulang nami.”

Protokol ni Paranak:
”Hujalo hami do dekke siuk sian hula-hula dohot tulang nami nahuparsangapi hami

  • 🙂 Didok margana jala digorahon sada-sada.

Mauliate godang ma hupasahat hami tu hamu hula-hula dohot tulang nami.”

Protokol ni Parboru:
“Dihamu borunami, asa seseati hamu jolo ate-ate dohot aliang-aliang on jala bagihon hamu tu angka tuturta.”

  • 🙂 Dibagihon angka borunasida i ma juhut nasineatan i tu angka tutur.
  • 🙂 Hasuhuton paranak mambagi (pasahathon) dekke najinalo nasida sian angka horong ni hula-hula dohot tulang tu angka dongan tubuna songon i tu boru/bere dohot dongan sahuta. Tu tulang dipasahat alai didokmai dekke lompan.

Protokol ni Paranak:
“Di hamu Borunami, asa i bagihon hamu dekke na i pasahat ti hita tu angka tutur ta.”

  • 🙂 Dibagihon angka borunasida i ma dekke i tu angka tutur.

Protokol ni Parboru:
“Di hamu raja ni pamoruonnami, tangkas do nangkin dipasahat hamu tudu-tudu ni sipanganon tu hami, didok hata ni natua-tua, Andorang so diseat raut jumolo ma diseat hata. Beha amangboru, hira songon dia ma partordingna?”

  • 🙂 Molo dung dos hian roha ni paranak, biasana nunga ditontuhon ise na gabe parhata dohot namambagi jambar. Alai, molo tung pe mangido tingki muse nasida, nauli ma i. Jadi molo dung dos roha ni paranak, ditontuhon ma namanghatai di parjambaron dohot di namarhata sinamot. Taringot di hatana, hira dos do songon naung niulahon ni parboru.

Protokol ni Paranak:
“Mauliate ma di rajai. Di sungkun-sungkun muna taringot di tudu-tudu ni sipanganon i, nungnga hupasahat hami tu hamu. Asa hamu ma rajanami namangaturhon. Molo sian hami pamoruonmuna, namangulahon ma hami.”

  • 🙂 Molo di ulaon alap jual, somalna didok si dapot solup ma paranak. Alai molo di ulaon taruhon jual, olo adong hata ni parboru mandok sidapot solup ma hami.

Protokol ni Parboru:
“Amangboru, molo dos rohanta, songonon ma konsep ni parjambaran: Sibagi dua ma tudu-tudu ni sipanganon i. Alai molo osang tu hula-hula nami mai, dohot ihur-ihur tinggal mai di hami.”

Protokol ni Paranak:
“Nunga nauli i Rajanami.”

  • 🙂 Diulahon ma namarbagi jambar, jala laos dipasahat ma hombar tu hasahatanna. Taringot di ruhut-ruhutna, pinatorang do di bagian ruhut-ruhut parjambaron na masa di adat humbang, Silindung & Samosir.

Partonding ni parjambaron adat di Humbang

Namarmiak-miak (pinahan lobu)

Goar ni jambar

  • 🙂 Sigagat duhut (horbo manang lombu natinutungan) dos do pambagian parjambaron songon pinahan lobu.
  • 🙂 Dung renta jala sidung namarsipanganon, jonjong ma protokol ni paranak laho mangido pangurupion sian nanigokkon na (dongan tubu, boru, dongan sahuta dohot ale-ale) laos di dok ma hira-hira songonon:

Protokol ni Paranak:
”Dihamu na huparsangapi hami amanta raja dohot inanta soripada, dihita mardongan tubu, boru bere nami, raja nidongan sahuta, ale-ale, saluhutna ma hamu nahugokkon hami, hirim situtu do roha nami di pangurupian muna, jadi ro ma hamu mandapothon hami laho pasahatton parbue ni holong muna tu hami, i ma tumpak na godang. Sian hami hasuhuton, nungnga mangarade be hami. Mauliatema.”

  • 🙂 Dipangido ma musik nahinsa-hinsa sitogu nahundul.
  • 🙂 Dung sidung managalehon tumpak angka horong na ni gokkon paranak, jonjong ma protokol ni paranak laho pasahatton hata maulite.

Protokol ni Paranak:
”Dihamu na huparsangapi hami amanta raja dohot inanta soripada, raja ni dongan tubu, raja ni pamoruon (boru bere) nami, raja nidongan sahuta, ale-ale, rodi sude hamu namangkaholongi hami, mauliate godang ma hupasahat hami tu hamu saluhutna diangka pambahenan muna, marhite-hite tumpak naung dipasahat mu tu hami. Anggo sian hadirion nami ndang tarbalos hami angka nauli nabinahen munai, alai ala adong do Amanta Debata pardenggan basa, ba mangido hami tutu ditangiang nami, asa sian Amanta Debata Pardenggan Basa I ma jaloon muna angka balos ni i tu hamu marlipat ganda.”

  • 🙂 Masa do muse taida, dung sidung acara manjalo tumpak, dilehon paranak do kesempatan tu pengantin boru laho mambuat (manjomput) tumpak i songon mambahen las roha nasida. Sada simbol manang tanda holong ni roha do i tu pengantin. Dungi laos dipasahat Protokol ma tumpak i tu suhut bolon songonon ma hatana:

Protokol ni Paranak:
“Dihamuna bonani suhut nami, godang do ta jalo tumpak sian saluhut namarholong ni roha tu hita, simpan dainang ma on, pangke dainang ma tunaringkot i.”

  • 🙂 Dung une jala renta mardalan sude na i, dipungka ma panghataion tu namarhata sinamot.

Protokol ni Parboru:
“Beha amangboru, nungnga boi torushononta ulaonta on?”

Protokol ni Paranak:
 “Nauli rajanami.”

Protokol ni Parboru:
“Alai amangboru mangido tingki hami satongkin, asa marsiparsangapan jala mardos ni tahi jolo hami angka namardongan tubu.”

  • 🙂 Laos ditorushon, jala hatana hira songon on:

“Di hita na mardongan tubu, haha-anggi, ingot do hita tu tona ni ompunta sada do hita, sisada anak sisada boru sada songon songon daion mual do hita dang dua songon dai ni tuak, ala hami sian haha (anggi) muna ma nuaeng na manghasuhuthon ulaonta on, hamu anggi (haha) nami ma nagabe panomboli. Didok natua-tua: Tinallik huling-huling asa tarida holi-holi, molo hahana (anggina) ma hasuhuton, anggina (hahana) panomboli.”
“Nuaeng pe hupasahat hami ma ulaon dohot angka panghataion tuhamu, asa hamuma namanungkun dohot namangalusi raja ni pamoruonta annon.”

  • 🙂 Manghatai ma angka haha-anggi ni parboru taringot tu pangidoan ni hasuhuton i, jala molo dung dos roha nasida, ditontuhon ma nagabe Raja Parhata, jala anggi manang hahana gabe sibagi jambar.
  • 🙂 Laos didok Parsinabung ni Parboru:

“Mauliate ma di hamu suhutnami. Tangkas do dipasangap hamu hami dongan tubumu. Hujalo hami ma pangidoanmuna i. Toho do i tutu, sada do hita sisada anak sisada boru sada songon daion mual do hita dang dua songon dai ni tuak. Sahali nari mauliate ma di suhut nami.”

  • 🙂 Laos diandehon Parhata ni Parborui ma hatana tu raja ni hula-hula dohot tulang) mandok:

Parsinabul ni Parboru:
Di hamu nahuparsangapi hami raja ni hula-hula dohot tulangnami: (huhut ma digorahon marga nasida), naeng pungkaonnami ma manghatai dohot raja ni pamoruonnami marga … raja nami raja bolon di jolo hamu raja siaduaon, di pudi pe hamu raja si paimaon, di tonga-tonga hamu raja sihaliangan sihorus nasuksuk do hamu rajanami sigohi nalonga.
Songon nidok ni umpama rajanami: Ranting ni bulu duri, sanjongkal dua jari, hula-hula dohot tulang naburju do hamu naolo manuturi jala naolo mangajari di hami borumu, antong mangido ma hami asa tiroi hamu hami di panghataionnami dohot pamoruonnami asa sude mardalan tu na denggan, dibagasan las ni roha, botima pangidoannami. Mauliatema.”

  • 🙂 Laos ditorushon ma panghataion tu paranak. “Di hamu raja ni pamoruon nami, molo dung rade hamu asa tapungka manghatai.”
  • 🙂 Molo dung dipasangap dongan tubu, boru, bere dohot horong ni hula-hulana, jala hira dung adong aba-aba persetujuan, ditorushon ma na manghatai. Sikap sisongon on porlu do lestarihononhon di ulaon paradaton. Alana molo di deba huta/luat di bona pasogit, gabe hira hurang arga nama hula-hula dohot angka tulang. Gabe hira dongan sahuta nama naberperan dohot manontuhon angka ulaon.

Protokol ni Paranak:
“Nauli Rajanami, alai lehon hamu jolo tingki di hami pamoruonmuna, asa jolo masipasangapan hami namardongan tubu.”
🙂 Dioloi parboru

Protokol ni Paranak:
“Di hita na mardongan tubu, haha-anggi, ingot do hita tu tona ni ompunta sada do hita, sisada anak sisada boru sada songon songon daion mual do hita dang dua songon dai ni tuak, ala hami sian haha (anggi) muna ma nuaeng manghasuhuthon ulaonta on, hamu anggi (haha) nami ma nagabe panomboli.

Didok natua-tua: Tinallik huling-huling asa tarida holi-holi, molo hahana (anggina) ma hasuhuton, anggina (hahana) panomboli. Nuaeng pe hupasahat hami ma ulaon dohot angka panghataion tu hamu, asa hamu ma namanungkun dohot namangalusi hula-hulanta Raja … annon.”

  • 🙂 Laos didok Parsinabul ni Paranak:

“Mauliate ma di hamu suhutnami. Tangkas do dipasangap hamu hami dongan tubumu. Hujalo hami ma pangidoanmuna i. Toho do i tutu, sada do hita sisada anak sisada boru sada songon daion mual do hita dang dua songon dai ni tuak. Sahali nari mauliate ma di suhut nami.”

  • 🙂 Laos diandehon parhata ni paranak ma hatana tu Raja ni hula-hula dohot tulang mandok:

Parsinabul ni Paranak:
”Dihamu nahuparsangapi hami raja ni hula-hula dohot tulangnami: (huhut ma digorahon marga nasida), naeng pungkaonnami ma manghatai dohot hula-hula nami raja i marga … raja nami raja bolon di jolo hamu raja siaduaon, di pudi pe hamu raja si paimaon, di tonga-tonga hamu raja sihaliangan sihorus nasuksuk do hamu rajanami sigohi nalonga.
Songon nidok ni umpama rajanami: Ranting ni bulu duri, sanjongkal dua jari, hula-hula dohot tulang naburju do hamu naolo manuturi jala naolo mangajari di hami borumu, antong mangido ma hami asa tiroi hamu hami di panghataionnami dohot raja ni hula-hula nami asa sude mardalan tu nadenggan, jala mangkorhon lasniroha, botima pangidoannami. Mauliatema.”

  • 🙂 Laos ditorushon ma panghataion tu paranak.

“Di hamu Hula-hula nami raja i marga … raja bolon, nungnga be mangarade hami.”

  • 🙂 Sian parhata sian parboru mangido asa dipasahat paranak pinggan panungkunan. Pinggan panungkunan i ma pinggan na marisi boras si pir ni tondi, demban/napuran sirara uruk, tanggo-tanggo, dohot ringgit/hepeng 4 (opat) lembar. Dipasahat raja parhata ni paranak ma pinggan panungkunan i (boru do na pasahathon) tu raja parhata ni parboru. Dung dihatahon hata ni pinggan panungkunan dohot na manungkun di hata ni sipanganon, dibuat ma 3 (tolu) lembar hepeng i, laos dipaulak ma pinggan panungkunan i tu raja parhata ni paranak (boru do na manaruhon).

Parsinabul ni Parboru:
“Amangboru, didok situa-tua: Tek tek mula ni gondang, serser mula ni tortor, sise mula ni hata, sungkun mulani uhum. Artia mula ni ari, sipaha sada mula ni bulan, Binsar ma mata ni ari poltak mata ni bulan. Ala naeng pungkaonta ma panghataion denggan ma dipasahat Raja ni Boru pinggan panungkunan.”

Parsinabul ni Paranak:
”Mauliatema rajanami, baris-baris ni gaja dirura pangaloan; Molo marsuruh raja daingkon do oloan, molo nioloan martambatamba ma nang pangomoan. Artia bonani ari, Sipaha sada bonani bulan; Ala nungnga manggora hula-hula laho mamungka manghatai, dison pasahatonnami ma pinggan panungkunan. Borunami; pasahat hamu pinggan panungkunan on tu jolo ni hula-hulanta”

  • 🙂 Pinggan panungkunan ima pinggan pasu marisihon: si pir ni tondi (dahanon), napuran (ganjil), hepeng: 4 lembar sipata ditambai dohot tango-tanggo (juhut).

Parsinabul ni Parboru:
”Mauliatema amangboru, dison nungnga dipasahat hamu pinggan panungkunan, pinggan pasu, nahot dihundulanna, asa dipasu-pasu Tuhanta ma hita saluhutna, jala hot ma hita di angka padan dohot uhum paradatonta i.”
“Songoni muse peak do napuran sirara uruk, napuran sirata bulung sipalas roha ni inanta soripada, ba sai rata ma antong parhorasan panggabean i dapotonta tujoloan on.
“Huhut do dison boras sipir ni tondi, parbue siribur-ribur sai anggiatma torop maribur ma antong pomparanta, di hamu parboruon nami, nang di hamipe hula-hula muna. Asa bintang na rumiris, tu ombun na sumorop. Anak pe antong riris, boru pe antong torop. Jala dohononnami ma; Asa pirma pokki, bahul-bahul pansaloman, pirma tondita ditambai Tuhan di hita angka pansamotan.”
“Dison adong muse ringgit sitio suara, homitan ni boru ni raja, sipatamba lasnirohanta diloloan bolonon, na nicetak ni pamarentanta, taridama antong dison na anak ni raja do hamu, pahompu ni namora, asa dohononnami ma: Binanga ni sihombing, binongkak ni tarabunga, tu sanggar ma amporik, tu lubang ma satua, sai sinur ma napinahan gabe naniula, hujalo hami ma on:”
(catatan: dibuat ma hepeng i, 3 lembar: salembar dilehon tu hambirangna, salembar dilehon tu siamunna, jala salembar ma hasurungan ni ibana parsinabung)
“Mauliatema amang raja ni boru … ala nungnga sahat tu hami pinggan panungkunan, songon hata ni natua-tua namandok: Nibutbut duhut-duhut laos dapot dohot halosi; Ala nungnga nijalo pinggan panungkunan, mulak ma muse pinggan pangalusi. Saonari pe mulak ma muse tu hamu songon pinggan pangalusi. Borunami pasahat hamu ma jolo pinggan pangalusi on tu paribanmu parhata ni borunami”.

  • 🙂 Diudutima hatana mandok:

”Amang raja ni boru … Nungnga bosur hita mangan indahan nalas, dohot sagat marlompan juhut nataboi, disi do gandina disi gandona, dibibirdo daina ditolonan do hinatabona, sirsir do sirana, hona nang asomna, laos dohot minum aek sitio-tio natinahuni namboru nami, sai tu tioma angka pansamotan dohot parsaulian i tu joloanon tumpahon ni Amanta Pardenggan Basai. Taringot disipanganon i dohononnami ma: Marbau tanduk, marbau holi holi, godang sibutong-butong, otik Sipir ni tondi. Sai pamurnas ma i tu daging. Saudara ma tu bohi. Sipalomak imbulu ma i. Sipaneang holi holi jala sipasindak panaili. Sinimbur ni pangkat ma tu sinimbur ni hotang, sai tudia pe hamu mangalangka sai disi ma hamu dapot pansamotan. Songon hata namandok: Sai jolo ninangnang do asa ninungnung. Sai jolo pinangan do asa sinungkun, Ia namanungkun ma hami nuaeng raja ni boru; Dia ma langkatna, Dia ma unokna; Dia ma hatana dia ma nidokna. Dipaboa raja ni boru ma”.

  • 🙂 Dung dijalo mulak pinggan panungkunan i asa dialusi sungkun-sungkun ni parboru taringot di sintuhu ni sipanganon i ma panggabean parhorasan.

Parsinabul ni Paranak:
“Gabe ma jala horas raja nami, dinamanungkun ma hamu tutu, disintuhuni sipanganon naso sadia i, andorang so hualusi hami, dohononnami ma: Godang sibutongbutong, otik si pir ni tondi, tung sosadia pe sipanganon nahupatupa hami, Sai pamurnasma tudaging, saudara tubohi, sipalomak imbulu, sipaneang holi-holi. Sititima sihompa, golang-golang pangarahutna; Tung sosadia pei nuaeng nahupatupa hami i, sai godangma pinasuna. Sai dipasu-pasu Tuhan-I ma hita saluhutna tujoloanon, gomos hita martangiang, sai lam tamba sinadongan dihami nang dihita saluhutna, asa tarpatupa hami muse natumabo sianon, laho pasangaphon hamu nahuparsangapi hami. Jadi ianggo taringot disipanganon naso sadiai, ba panggabean parhorasando nidokna. Botimada raja nami.”

  • 🙂 Patangkashon disiangkup ninauli sidonganni nadenggan dipanggabean parhorasan.

Parsinabul ni Parboru:
”Horasma jala gabe amangboru dialusmunai, ia didok hamu parhorasan panggabean do hape nanidokna, ba mauliate ma tadok tu Amanta Pardengganbasai, tutuma songon hata na mandok: Timbo dolok martimbang panatapan tu pangaloan; Sai manumpak ma Amanta Debata nadiginjang, sai ro ma dihamu singkat ni i marlipat ganda angka pansamotan. Didok natua-tua: Marangkupdo nauli, mardongando nadenggan. Siangkup songon na hundul, jala udur songonna mardalan; Disiangkup panggabean parhorasan amangboru, manungkun jala manangkasi ma hami amangboru songon hata na mandok: Tangkas ma uju Purba. Laos tangkas ma uju angkola; Tangkas ma hita maduma. Laos tangkas ma hita mamora. Tangkas ma i paboa hamu amangboru hata nauli hata nadenggan asa tangkas dibege angka amanta raja dohot inanta soripada tarlobi angka raja ni hula-hula dohot tulang. Botima raja ni boru”

  • 🙂 Napasahat sinamot songon somba ni uhum, somba ni adat dohot mangulahon adat na gok.

Parsinabul ni Paranak:
”Nauli raja nami. Tung mansai las situtu rohanami umbege sungkun-sungkunmunai, tutu ma hamu sisuan bulu jala sipanjala, siboto uhum do hamu jala angka anak ni raja. Songon nanidokmunai raja nami: Tangkas ma uju purba; Laos tangkas ma uju angkola; Tangkas ma hita maduma; Laos tangkas ma hita mamora. Paboaonnami ma rajanami angkup ni parhorasan panggabean i: Didok umpama ni ompunta najolo: Denggan ma bulu godang, denggan baen hite-hite. Molo anak manang boru balga jala magodang, denggan ma asa hot ripe. Asa tubuan laklak tubuan singkoru i dolok purbatua. Asa tubuan anak dohot tubuan boru ma nasida, jala jengkar-jengkar dihangoluan, dongan nasida saur matua.”

“Di tingki ari na salpu i nunga tangkas ro hami di mandapothon hamu di napatua hata dohot marhusip. jala nangkin nunga rap mangudurhon hita di anak nami dohot boru ni rajai tu adopan ni Amanta Debata di Bagas JoroNai laho manjalo pasu-pasu parsaripean nasida marhite naposo ni Tuhanta. Mauliate ma di Tuhanta Pardenggan Basai. Marpungu ma hita nuaeng dibagas namarampang namarjual sigonggom pangisina on, asa mangido dohot mangelek ma hami tu hamu raja nami diharadeon ni rohamu, asa tauduti ma nian ulaonta on namarhata somba ni uhum somba ni adat marhite-hite sinamot ni boru ni rajai.”

  • 🙂 Mangalusi hata ni paranak, mangido asa dihatahon godang ni sinamot sipasahaton ni suhut paranak.

Parsinabul ni Parboru:
”Tutuma nanidokmunai amangboru, denggan ma bulu godang denggan baen hite-hite molo anak manang boru balga jala magodang, denggan ma asa hot ripe. Jala didok hamu asa tauduti ulaonta namarhata somba ni uhum somba ni adat marhite-hite sinamot ni boru nami. Mauliate ma di Debata, mauliate ma dihamu raja ni borunami. Ai nunga pitu lili nami paualu jogianami, nungnga nauli nipinami, adong hamu pandurungan nami, ba tangkas do huboto hami anggo hamu raja … Pat ni gaja tu pat ni hora angka pomparan ni raja do hamu jala angka namamora. dibahen i pasahat hamu ma sinamoti mansai godang. Botima hatanami raja ni boru”

  • 🙂 Mangido asa sisahali manombahon/mangelekhon paranak disinamot sipasahaton, Sinamot sipasahaton nasida i dielekhon ma asa sitombol manang rambu pinudun.

Parsinabul ni Paranak:
”Mauliatema raja nami, suang songoni dohonon nami tu hamu hula-hula nami, tangkas do huboto hami hamu raja nami pat ni gaja tu pat ni hora angka anak ni raja do hamu jala angka namora, dohot naburju marroha. Tangkas do hutanda hami burju ni rohamu raja nami marboru: Ai songon nidok ni umpamai raja nami: Urat ni singkoru, dihungkupi bulung bira, anggo haburjuon ni hamu Raja …  marboru nungnga tarbarita sahat ro didia. Mangingot i do raja nami umbahen nabarani hami ro toadopanmu: Ai ida-ida do nabutong jora-jora do namale. Jadi namarsomba ma hami tu hamu raja nami taringot tu somba ni uhum somba ni adat marhite-hite sinamot ni Parumaen nami, tarsongon on ma nian raja nami elek-eleknami asa sisahali manombahon ma hami rajanami disomba ni uhum, somba ni adat digodang ni sinamotni parumaennami sipasahaton nami tu hamu hula-hulanami. Songoni ma somba pangidoannami tu hamu raja nami”.

  • 🙂 Dipaliat panghataioni tu raja niboru, tu dongan tubu, huhut mangido panuturion sian horong hula-hula dohot tulang.

Parsinabul ni Parboru:
“Horas ma jala gabe amang raja ni boru … pangidoanmu asa sahali mangelekhon sahali manombahon hamu di godang ni sinamot, anggo ahu sandiri ala tangkas do hamu tinanda naburju marhula-hula, alai amangboru, asa tung tangkas botoon ni angka amanta raja dohot inanta soripada dipangidoanmu di somba ni uhum, somba ni adat dohot di hata ni sinamot sipasahaton mu, mangido tingki ma jolo hami amangboru laho mangido pandapot dohot panuturion sian hami namardongan tubu, songoni nang boru dohot berenami, tarlobi ma raja ni hula-hula dohot tulang nami.

Dihita namardongan tubu, songoni nang boru dohot berenami, tarlobi di hamu sude nahuparsangapi hami raja ni hula-hula dohot tulang nami, nungnga rap umbege hita dipangidoanni pamoruonta asa sisahali mangelekhon/manombahonma nasida disomba ni uhum, disomba ni adat dohot di godang ni sinamot sipasahaton nasida, ima sinamot nagok sitombol, alap jual, jala ulaon sadari, beha alusmu?”

  • 🙂 Songon on ma pangatur ni panungkunan: (ndang pola be tinaringotan Horbo, Lombu d.n.a.) parjolo dipasahatma tu boru dohot bere:
  • 🙂 Hata Sian Boru:

“Mauliate ma raja nami, diingot hamu do hami antong borumu, anggo sian hami borumu, alusnami sipangihut do anggo hami, songon dia pe haputusanmu raja nami, namangihuthonma hami, botima hata nami raja nami.”

Parsinabul ni Parboru:
“Songonima alus sian borunta, nuaeng pinasahat ma tu hita namardongantubu”

  • 🙂 Hata Sian Dongantubu:

“Mauliatema hahadoli, songoni pos niroham tu pangidoan ni pamoruonta taringot di sinamoti, songoni do nang hami dongan tubumu sadado hita songon daion mual, songon dia pe pandokmu/alusmu tu pamoruonta songonido nang alusnami, hupasahat hami ma tu hamu haha/anggi doli, ima hata sian hami sude dongantubu.

Parsinabul ni Parboru:
“Mauliate ma husapahat tu hamu dongantubu”

  • 🙂 Parhata parboru mangandehon hata tu sude hula-hula, unang lupa manjouhon marga ni hula-hulai:

Parsinabul ni Parboru:
”Dihamu saluhutna hula-hula nami; nungnga rap umbege hita raja nami di pangidoan ni pamoruon nami di somba ni uhum, somba ni adat di hata ni Sinamot sipasahaton nasida tu hita asa nian sahali mangelekhon, sahali manombahonma ninna nasida. Andorang so hualusi hami pangidoan ni pamoruon nami asa pos rohanami raja nami mangido ma hami dipanuturion sian hamu sude hula-hula nami, ai songon nidok ni ompunta sijolo-jolo tubu: Ranting ni bulu duri, sanjongkal dua jari, hamu do hula-hula naburju manuturi, huhut hula-hula pangajari.

(laos digora ma boruna laho pasahathon microphone tu hula-hula)”

  • 🙂 Hula-hula manungkun donganna sahundulan, biasana satolop do nasida tulang ni boru muli ma mangalusi.
  • 🙂 Hula-hula ni parboru:
  • “Horas ma jala gabe dihamu raja ni borunami, taringot ni pangidoanmu tu hami hula-hulamu, nungnga satahi hami, ahuma namangalusi: Mansai las rohanami umbege panghataionmuna hamu namarhula-marboru naung masipaolo-oloan, sian hami hula-hulamu sidohonon nami tu hamu ba balintang ma pagabe, tumondalhon sitadoan; Sai asi ma rohani Tuhanta. Arimuna ma gabe molo olo hamu masipaolo-oloan. Songoni ma hata sian hami hula-hula muna.”

Parsinabul ni Parboru:
“Mauliate godang ma dohonon nami tuhamu hula-hula dohot tulang nami i panuturion muna. Songoni ma dihamu raja ni pamoruonnami, nungnga dibege hamu panghataion sian hami namardongantubu, borunami, tarlobi sian hula-hula nami, jadi andorang so hualusi hami pangidoanmunai amangboru, haru dipatangkas amangboru ma somba ni uhum, somba ni adat dohot godang ni sinamot ni borunami nanaeng sisombahononmu tu hami, asa dibege sude amanta raja dohot inanta soripada naliat nalolo, songoni ma hatanami amangboru.”

  • 🙂 Dipaliat pangkataion tu raja niboru, dongan tubu, huhut mangido panuturion sian horong hula-hula dohot tulang, sidungi dipaboa ma godang ni sinamot sipasahaton.

Parsinabul ni Paranak:
“Horas ma jala gabe rajanami, andorang so husombahon hami pangidoannami rajanami asa tangkas diida rajai naung sahata hami, dengganma hupangido soara sian hami namardongantubu, borunami tarlobi dohot hula-hulanami, lehon hamu ma jolo tingki dihami asa manghatai hami rajanami.”

Parsinabul ni Paranak:
Didok ma hatana songon on: “Di hamu boru dohot berenami, hamu do nahupangasahon hami di ulaonon, asa pos roha ni hula-hulanta naung sisada hata sisada tahi hita dihata ni sinamot sisombahononta tu hula-hula parboru, asa lehon hamu ma hata sian hamu boru dohot berenami”

  • 🙂 Hata sian Boru dohot Bere:
  • “Mauliate ma dihamu hula-hulanami, taringot ni hata sian hami rajanami, songon dia pe nanaeng hatahononmu taringot tu sinamot dohot ulaon adat tu hula-hulani hula-hulanami, rade ma hami boru dohot beremu laho manungkoli hamu di gogo dohot sipatupaon. Mauliate ma.”

“Songoni ma dihamu saluhutna nahuparsangapi hami raja ni hula-hulanami (didok ma susunan ni hula-hulai suang songoni dohot marga nasida), nungnga dibege hamu pangidoannami tu raja ni hula-hulanami asa sahali manombahon nian hami digodang ni sinamot sipasahatonnami. Andorang so huhatahon hami pangidoannamion rajanami: mangido ma hami dipanuturion sian hamu, ai hula-hula naburju do hamu naolo maniroi hami angka pamoruonmu, ai songon nanidok ni ompunta naparjoloi do dohononnami: Dijolo hamu siaduon rajanami, dipudi hamu sipaimaon, sihorus na gok do hamu rajanami, sigohi nalonga, hupasahat hami ma panghataion on tu hamu, botima. (huhut dijou boruna laho pasahathon microphone)”

  • 🙂 Hata sian Hula-Hula ni Paranak ndang pola berbedai sian hata ni hula-hula ni parboru, tong do balintang ma pagabe tumandanghon sitadoan, arimuna ma gabe molo dung masipaolo-oloan, songoni ma hata sian hami sude hula-hulamuna. Dungi dipasahat ma tu dongan tubu.
  • 🙂 Hata sian Dongan Tubu ni Paranak:
  • “Sian hami dohononnami ma ala naung sahata do hita sian mulanai ba songon dia ma hatamu naung sahata ma hita hahadoli, botima alusnami.”

Parsinabul ni Paranak:
“Rajanami, hula-hulanami nungnga dibege hamu naung sahata do hami namardongan tubu, borunami tarlobi dipanuturion sian hula-hulanami, dipangidoannami asa sahali manombahon, sahali mangelekhon hami disomba ni uhum, somba ni adat, di godang ni sinamot sipasahatonnami. Antong rajanami, mangoloi pangidoanmunai asa dohononnami ma: disi ma horbona, disi ma lombuna, masna, dohot serena, alai rajanami unang pola lola hamu pabarahon horbo, dohot lombu i, hupasada hami ma sudenai gabe Rupiah ni pamarentanta. Sinamot na gok sipasahatonnami: Sitombol ma rajanami, alap jual, ulaon sadari, jala godangna rajanami sombahononnami ma Rp. 150.000.000,00 (seratus lima puluh juta rupiah).”

  • 🙂 Manungkun di suhi ni ampang na opat ni parboru, sialusanni paranak do manang panandaion.”

Parsinabul ni Parboru:
“Mauliate ma raja ni boru, Rp. 150.000.000,00 (seratus lima puluh juta rupiah) ma godang ni sinamot sipasahatonmu, sitombol, alap jual dohot ulaon sadari alai nang pe songoni, anggo upa ni suhi ni ampang naopati dohot angka nahombar tusi pasahatonmu do ate amangboru.”

  • 🙂 Molo sialusan ni paranak do suhi ni ampang ni parboru, todoan/hepeng sian paranak tung tangkas do alusannami/panandaion di suhi ni ampang na opat ni raja i.

Parsinabul ni Paranak:
“Baris-baris ni gaja dirura pangaloan molo marsuru raja, daema sooloan ba songon dia pandok ni rajai tangkas do alusannami/panandaion di suhi ni ampang na opat ni raja i. Huoloi hami mai rajanami.”

  • 🙂 Pasahathon pangkataion i tu hasuhuton di godang ni sinamot jala molo dung diolophon hasuhutan, baru pe asa digabehon raja parhata.

Parsinabul ni Parboru:
“Mauliate ma raja ni boru”.
“Songonima dihita saluhutna napunguon, tarlobi dihamu hula-hulanami dielek-elek ni pamoruonnami dihata ni sinamot dohot godangna nungnga rap umbege hita. Alai, (dipasahat hatana tu suhut sihabolonan) di hamu suhut sihabolonannami, didok natua-tua lasiak natata andigan ho tu panggilingan, manghatai pe rajahata, dihamu suhut sihabolonan do anggo keputusan. Nungnga dipaboa pamoruonta pangidoan nasida di somba ni uhum, somba ni adat dohot godang ni sinamot ni borunta sipasahaton nasida ima godangna Rp. 150.000.000,00 (seratus lima puluh juta rupiah) sitombol, ulaon sadari. Ianggo suhi ni ampang na opati tangkas do adopan nasida. Hupasahat hami ma tu hamu.”

  • 🙂 Hata alus sian suhut sihabolonan, manang paidua ni suhut

“Horas ma jala gabe, dihamu hahadoli/anggidoli – dangkana do rantingna songon dia hata ni hahana songoni do hata ni angina. Mauliate ma dihamu saluhutna, sada do hita songon daion mual, sisada anak sisada boru, songon dia pe naung dihatai hamu dohot pamoruonta, molo dung denggan dirohamu nadohotdo hami marlas niroha disi, mauliate ma dihamu.”

Parsinabul ni Parboru:
“Dihamu raja ni pamoruonnami, nungnga be sisada hata sisada pandohan hami hula-hulamuna, sai songon nidok ni umpama ma; Amporik mallipik, onggang marbabang, sai gabe ma parsinamot naotik, gabe ma parsinamot nagodang. Dipangidoanmuna asa sombahononmu ma godang ni sinamot sipasahatonmu tu hami hula-hulamuna godangna Rp. 150.000.000,00 (seratus lima puluh juta rupiah) sitombol, ulaon sadari tambani jambar ni suhi ni ampang naopat, huoloi hami mai, horas ma jala gabe, ro ma hamu, pasahat hamu ma.”

  • 🙂 Suhut paranak pasahathon sinamot tu suhut parboru. Diuduti ma tu namanggorahon suhi ni ampang na opat. Sada-sada digoari sijalo todoan, jala suhut paranak ma na pasahathon. Suhi ni ampang na opat i ma; 1) Pamarai: haha manang anggi ni hasuhuton; 2) Simandokkon/simolohon: lboto ni boru muli naung hot ripe; 3) Pariban dohot Tulang.

Parsinabul ni Paranak:
“Horas ma jala gabe rajanami, mauliate ma dipangoloionmuna dielek-elek nami. Laos digora ma suhut paranak huhut mandok songonon: Di hamu suhut sihabolonan nunga tangkas dioloi hula-hulanta pangidoanta di godang ni sinamot sipasahatonta, ro ma hamu laho pasahathon Sinamot Nagok tu hula-hulanta.”

  • 🙂 Dung dipangido musik. Ro ma rombongan ni suhut sihabolonan paranak mamboan sinamot diatas ni piring dohot sipir ni tondi, dipasahat ma jolo tu parhata ni paranak, dungi dipasahat nuse tu parhata ni parboru, baru pe asa borhat nasida manomba suhut sihabolonan parboru.
  • 🙂 Dung ditortorhon, dipatedek suhut parboru ma ulosna jala disaburhon inanta sian paranak ma sinamoti dohot sude isi ni pinggani tu ulosi. Dibungkus inantai ma sinamoti laos dibagasan ulosi, dungi masijalangan.
  • 🙂 Ihut ma muse pasahat parjambaran tu suhi ni ampang naopat dohot uduranna:
  • Suhut sihabolonan parboru: Sijalo sinamot sian suhut paranak
    • Upa ni sijalo bara: napasahathon pamarai
    • Upa pariban: napasahathon sihunti ampang
    • Upa tulang: dipasahat suhut sihabolonan paranak dohot suhut parboru, laos dipasahat suhut parboru ma pinggan panganan tu tulang …
    • Upa ni simandokhon: dipasahat anak manjae
    • Upa todoan, parorot dohot lan angka sijalo jambar: sesuai tu susunan sian parboru
    • Pomparan ni ama ni suhut marhaha maranggi: sijalo upa todoan
    • Pomparan ni ompung marhaha maranggi: sijalo upa todoan / panghaei
    • Pomparan ni amang mangulahi marhaha maranggi: sijalo upa todoan / bola tambirik
    • Iboto ni suhut: sijalo upa parorot
    • Punguan ni marga: sijalo upa punguan
    • Pinggan panganan: tu parboru upa ni natorop (biasana parboru do paradehon pinggan panganan alai dipasahat ma jolo tu parhata ni paranak asa songon na sian paranak pinggan panganan i)
    • Tulang ni hela: sijalo upa tintin marangkup (napasahathon suhut parboru nidonganan ni suhut paranak) dijalo suhut parboru ma amplop namarisi hepeng sian suhut paranak laos dipasada tu amplop nanaeng sipasahatonna tu tulang ni helai.
  • “Suhut parboru pasahathon tintin marangkup/hepeng tu tulang ni anak mangloli, diudurhon suhut paranak.”

Parsinabul ni Parboru:
“Di hamu Raja ni Pamoruonnami, saonari sahat ma hita pasahathon jambar nagok tu tulang ni hela nami, ima sijalo tintin marangkup, haha parhundulnami Raja i Marga …,” (laos digorahon asa mangarade jala borhat suhut parboru.

  • 🙂 Digorahon ma tu suhut paranak asa borhat pasahathon tintin marangkup tu tulang ni pangoli.
  • 🙂 Rap borhat ma paranak dohot parboru pasahathon upa tulang so jalo tintin marangkup, alai napasahathon, pihak parboru ma.
  • 🙂 Taringot tu godang manang bilanganna saguru tu dos ni roha do i.
  • 🙂 Laos dihatahon ma, nungnga be hujalo hami sinamot ni borunta i, hami ma tutu songon pangintubu, hamuna ma painundun, otik so sadia sian sinamot na hujalo hami i pasahaton ma nuaeng tu hamu, las ma rohamu manjalo. Tung otik pe I, sai godangma pinasuna. Mamasu masu ma tondimu dohot sahalamu marhite tangiang tu Tuhanta asa sahat horas jala gabe borunta i. Botima.
  • 🙂 laos dipasahat ma jambar ni tulang ni hela.

Hata ni Suhut Parboru:
“Dihamu dongan sahundulannami, tulang ni helanami. Songon nidok ni umpama: Hot do jabui, hot margulang-gulang, tung boru ni ise pe dialap berenibai, tong doi boru ni tulang. Tingkion, borunami ma dialap beremuna. Godang do hujalo hami sinamot ni boruntai, ba dison otik godangna sian sinamoti hupasahat ma sipalas rohamu dohot pangidoannami tu hamu tungpe borunami dialap beremi ba sisada boru ma hita di boruntai. Las ma rohamu manjalo, Horasma, jala mauliate”

Hata ni Tulang ni Hela:
“Mauliate ma dihamu dongan parhundul nami marga ,,, tutu ma songon nidokmunai, hot pe jabui hot margulanggulang, tung boruni ise pe dialap berenibai, tong doi boru ni tulang. Dison nunga dipasahat hamu tutu sian Sinamot ni Boruntai sipalas rohanami/upa tintin marangkup mauliate ma dihamu, jala dohononnami ma: molo tung borumuna pe nuaeng dialap berenamii, naung borunami mai jala dohononnami ma sisada boru ma hita. Mauliate ma dihamu.”

NB:

  • Laos di tingki on ma di pasahat hasuhuton ni paranak muse upa tulang dohot tu sude horong ni hula-hula nanigokhonna.
  • Tintin marangkup tu tulang ni hela dipasahat dung dijalo parboru pinggan panganan nasida.
  • Dung di alusi tulang ni hela, mulak ma suhut parboru dohot paranak tu hundulannasida (hepeng, sipasahaton i sian suhut paranak do i dohot sian suhut parboru dohot perbandingan songon naung disepakati dua hasuhuton bolon paranak dohot parboru).

Parsinabul ni Parboru:
“Amangboru, nuaeng pe pasahat hamu ma pinggan panganan tuhami.”

  • 🙂 Sesuai tu panghataion, molo pinggan panganan dohot ulos-ulos masialusi di ibana be, suhut parboru ma paradehon pinggan panganan, di pasahat ma i tu paranak. Songon i ulos-ulos tinonun sadari dipasahat paranak ma i tu parboru.
  • 🙂 Parsinabung ni paranak ma muse pasahathon pinggan panganan i tu parsibul ni parboru. Jala sebalikna, dipasahat parsinabung ni parboru ma ulos-ulos natinonun sadari i tu parsinabung ni paranak.
  • 🙂 Godang ni pinggan panganan dohot ulos-ulos na tinonun sadari, disesuaihon do i dohot godang ni undangan. Alai molo godang ni bilang-anna disesuaihon ma nian dohot ruhut paradaton, jala molo boi, dibahen hian ma angka goarni sijalo pinggan panganan dohot ulos-ulos i.

Parsinabul ni Parboru:
“Di hita namardongan tubu, boru, bere, raja ni dongan sahuta, dohot sude raja ginokkon, di son nungnga tajalo pinggan panganan jala tabagi pe on jala dipasahat tu hasahatanna.”
“Amangboru, mauliate ma dohononnami tu hamu pamoruonnami, nungnga sude hami marlas ni roha, ganup do hami taruli di sinamot nagok naung pinasahatmuna, ba didok rohanami amangboru, asa dos nangkokna dohot tuatna, atik adong sipangidoonmu sian hami hula-hulamuna, dok hamu ma, ontak ni natolap gogonami oloannami do pangidoanmu.”

  • 🙂 Dung sahat tintin marangkup tu tulang ni hela diuduti ma muse dohot na mangido ulos herbang.

Parsinabul ni Paranak:
“Horas ma jala gabe rajanami, mansai las rohanami diboa-boamunai, asa pasahatonnami ma pangidoannami tu hamu rajanami: Anggo pangidoan rajanami asa ulosi hamu ma hami sude dohot ulos herbang didongani tangiangmuna mangido pasu-pasu sian Amanta Pardenggan Basai, songoni ma pangidoannami rajanami, mauliate ma.”

  • 🙂 Ala naung adong hian panghataion taringot tu bahat ni ulos herbang sipasahaton ni parboru tu pihak ni paranak.
  • 🙂 Godang ni ulos herbang sipasahaton ni parboru tu paranak nungnga ditontuhon hian i ditingki na marhusip, alai sikkap ni ulos herbang sipasahaton ima dohot ulos tinonun sadari (hepeng).

Parsinabul ni Parboru:
“Mauliate ma Amangboru, sintong do pangidoanmunai, alai songon naung hudok hami dihatanami naparjolo nangkaning, ontakni naboi tarbahen hami ulosannami do hamu dohot ulos herbang, alai molo tung so sude pe hamu anon naboi huulosi hami dohot ulos herbang, pasahatonnami ma tu nasida ulos natinonun sadari, songonima Amangboru, mangaradema hamu, asa hupasahat hami angka ulos herbang tu hamu. Gorai amangborungku ma sian i.”

  • 🙂 Digorahon jala dijoui parsinabung ni paranak ma angka si jalo ulos, i ma:
    • Ulos pansamot/pargomgom tu natoras ni hela.
    • Ulos hela.
    • Ulos pamarai tu amangtua/amanguda ni hela.
    • Ulos simanggokkon tu haha ni hela.
    • Ulos sihunti ampang tu iboto ni hela.
    • Ulos tu namboru ni hela.
    • Ulos tu ompung ni hela.
    • Ulos tu iboto ni hela.
    • Ulos boru/bere parsadaan.
    • Ulos parsadaan,
    • Dohot udutanna.
  • 🙂 Filosofi dan makna ulos passamot: Makna ulos Pargomgom ialah agar kedua orangtua pengantin lelaki mulai hari perkawinan itu manggomgom parumaennya, sebagai anak dalam keluarga sendiri serta selanjutnya mengayominya.
  • 🙂 Hata napasahatton ulos passamot sian natoras ni boru muli: Di hamu lae dohot ibotongku, pasahatonnami ma ulos pansamot tu hamu. Sai dipargogoi Tuhanta ma hamu mangalului pansamotan dohot ngolu-ngolu siganup ari. Hipas-hipas ma hamu jala ganjang ma umurmu. Jala anju hamu borungki naung gabe parumaenmu. Asa songon hata ni umpasa ma dohononku:

“Pir ma pongki bahul bahul pansalongan.; Sai pir ma tondimu sai tu gandana ma angka pansamotan.”
“Andor halumpang Togu-togu ni lombu, Andor hatiti Togu-togu ni horbo; Penggeng saur matua ma hamu pairing-iring anak dohot boru, Sahat tu namarnini sahat tu namarnono..”
“Sahat sahat ni solu, sahat tu bantean; Nunga sahat be nataparsinta. Sai sahat ma hita horas jala gabean.”

  • 🙂 Hata napasahathon ulos pangamai sian natoras ni boru muli:

“Pir ma pongki bahul bahul pansalongan. Sai pir ma tondimu sai tu gandana ma angka pansamotan.”
“Niumpat padang togu mangihut simbulubulu. Tu lelengna ma hamu mangolu rodi nasarsar uban di ulu, sahat tu na pairingiring pahompu.”
“Sahat sahat ni solu, sahat tu bantean. Nunga sahat be tahinta. Sai sahat ma hita horas jala gabean.”

  • 🙂 Hata napasahathon ulos hela sian natoras ni boru muli:

Di ho amang hela dohot di ho ito, borungku. Pasahatonnami ma tu hamu ulos herbang ulos naganjang, ulos parhorasan. Herbang ma tangan ni Tuhanta mamasu-masu parsaripeonmu. Ganjang ma antong umurmu sahat tu nasaur-matua. Ulos parhorasan ma on, asa gabe di anak gabe di boru hamu tumpakon ni Tuhanta Pardenggan Basa i. Asa dapot ma di hamu songon hata niumpasa:
“Bintang na rimiris ma, tu ombun na sumorop; Asa anak pe antong di hamu riris, boru pe antong torop.”
“Dangka ni arirang na peak di tonga ni onan (Diginjang do arirang, di toru panggonggonan), Badanmuna ma na so sirang tondimuna sai masigomgoman.”
“Tubuan laklak ma, tubuan sikkoru di dolok ni purbatua; Sai tubuan anak, tubuan boru ma hamu, donganmu sarimatua.”
“Pir ma pongki, bahul-bahul pansalongan; Sai pir ma tondimuna, jala tongtong hamu masihaholongan.”
“Tangki jala hualang, garinggang jala garege; Tubuan anak ma hamu, partahi jala ulubalang, Tubuan boru par-mas jala pareme.”
“Di ginjang ma ia arirang, di toru ia panggongonan; Badanmu ma naso ra sirang, tondimuna sai masigomgoman.”
“Tubuan laklak ma, tubuan sikkoru di dolok ni Purbatua; Sai tubuan anak, tubuan boru ma hamu, donganmu sarimatua.
“Sahat-sahat ni solu, sahat ma tu tiga ras; Sahat ma hamu leleng mangolu, sahat gabe jala horas.” Marsangap ma Tuhanta i di parsaripeonmuna on.

  • 🙂 Hata di na pasahathon Ulos Amangtuana

“Sai marsinondang songon bulan. Tiur songon mata ni ari. Sai ganjang umur muna, jala tiur nang pansamotan.”
“Eme si tamba tua, parlinggoman ni siborok, Debata namartua sude ma hita diparorot.”
“Sahat sahat ni solu, sahat tu bontean, sahat ma leleng mangolu, sahat ma tu panggabean.”

  • 🙂 Hata napasahathon Ulos Amangudana

“Sitorop ma dangkana, sitorop rantingna, Sitorop ma nang bulungna; Sai torop ma hahana, torop angina, Torop ma nang boruna.”
Eme si tamba Tua, parlinggoman ni siborok, Debata namartua sude ma hita diparorot.”
Sahat sahat ni solu, sahat tu bontean, sahat ma leleng mangolu, sahat ma tu panggabean.

  • 🙂 Hata napasahathon Ulos Haha Ni Hela

“Tubu ma hariara, di tonga-tonga ni huta; Sai tubu ma anak dohot borumu, Na mora jala na martua.”
“Eme si tamba Tua, parlinggoman ni siborok, Debata namartua sude ma hita diparorot.”
“Sahat sahat ni solu, sahat tu bontean, sahat ma leleng mangolu, sahat ma tu panggabean.”

  • 🙂 Hata napasahathon Ulos Sijujung Ampang

“Pinantik hujur tu jolo ni tapian; Tusi hamu mangalangka, tusi ma dapot parsaulian.”
“Pangkat-hotang; Tu dia hamu mangalangka, tusi ma dapot pangomoan.”
“Sahat sahat ni solu, sahat tu bontean, sahat ma leleng mangolu, sahat ma tu panggabean.”

  • 🙂 Hata napasahathon Ulos Namboruna

“Simbora gukguk, di julu ni tapian. Horas jala gabe hita luhut, jala dapotan parsaulian.”
“Hau simartolu, di tombak ni Panamparan, Sahat ma hamu leleng mangolu di haliangi angka pomparan.”
“Sahat sahat ni solu, sahat tu bontean, sahat ma leleng mangolu, sahat ma tu panggabean.”

  • 🙂 Hata napasahathon Ulos Ompungna

“Niumpat padang, togu mangihut sumarbulubulu. Eme na marbiur di lambung ni hariara.”
“Sahat sahat ni solu, sahat tu bontean, sahat ma leleng mangolu, sahat ma tu panggabean.”

🙂 Hata napasahathon Ulos Herbang Lainnya

“Situbu ni laklak ma situbu ni singkoru di dolok purbatua situbu ni anak ma jala situbu ni boru, donganmu saurmatua.”
“Bintang ma na rumiris tu ombun na sumorop, anak pe di hamu riris boru pe tung torop.”
“Eme si tamba tua, parlinggoman ni siborok, Debata namartua sude ma hita diparorot.”
“Simbora gukguk rarak diatas amak. Mamora ma hita huhut, torop ma boru dohot anak.”
“Sahat sahat di solu sahat ma tu bontean, sahat ma leleng mangolu. Sahat ma tu panggabean.”

Catatan:

  • Di tingki pasahathon ulos passamot (paranak) ingkon tangkas do pasahaton ni parboru marhite-hite hata pasu-pasu, unang holan asal diuloshon. Molo tu si jalo todoan, boi ma ulos dipasahat sahali tolu manang opat, alai hot ma dipasahat angka pasu-pasu marhite hata pangidoan tu Tuhanta (marhite angka umpasa). Songon soso-soso tu parboru, molo boi nian unang ma tapasahat ulos naung hea dipangke (nata pe baru dope) tu paranak. Alana, gabe mangurangi holong di angka na martutur, jala muse, asa marlapatan manang bermakna ulos herbang i di na manjalo. Didok natua-tua martondi do ulos Batak. I do umbahenna godang ragamna songon makna ni ulos i.
  • Nasomal taida ditingki na pasahathon ulos hela, adong bunga-bunga ni ulaon i ma na adong sipata ende, tari-tarian, angka na denggan ma i tutu. Alai namansai porlu dipasahat di tingki na pasahathon ulos i, i ma ditariashon natoras ni boru muli ma di si harapan, pesan, pangidoan nasida, jala sude suhut parboru (nahundul di jolo) mandongani natoras ni boru muli. Ala mardalan do tingki, unang ma nian marganjang-ganjang angka panghataion jala molo tung adong pe ende (lagu), ingkon na hombar ma i tu ulaon i. Dung dipasahat Ulos Passamot dohot Ulos Hela, mangihut ma muse ulos tu Pamarai, ulos tu Simanggokhon, dohot ulos tu Sihunti Ampang (suhi ni ampang na opat).
  • Dung sidung pasahat ulos, dipasahat parboru ma tu paranak ulos-ulos na tinonun sadari, songon naung pinatorang di jolo.

Parsinabul ni Paranak:
“Mauliate ma di hamu rajanami. Nunga tangkas hami sude diulosi hamu, marhite ulos herbang dohot ulos-ulos na tinonun sadari. Mauliate ma!”
“Jala molo adong sipasahatonmuna tu anak dohot parumaennami, hupasahat hamima partingkion tu hamu.”

Parsinabul ni Parboru:
“Nauli amangboru. Suru hamu ma hela dohot borunami asa hundul tu jolo on.”
🙂 Pasahat ulos holong ma sian horong ni parboru tu pengantin. Jumolo ma sian hasuhuton, namarhaha-anggi (Ring-1: ima Sasohe) dungi pe asa boru/bere, dongan sahuta, punguan, dohot udutanna.
🙂 Digorahon tu sude hula-hula, tulang, jala didok margana:
”Dihamu nahuparsangapi hami, hula-hulanami, tulang, bona tulang, tulang rorobot, hula-hula namarhaha-anggi, hula-hula anak manjae. Rajanami, molo adong nalaho sipasahatonmu tu beremu, asa hupasahat hami ma tingki on tu hamu. Alai molo tung siat elek-elek pangidoannami Raja nami, asa laos di tingki on ma hamu pasahathon angka pasu-pasu, hata sigabe-gabe rajanami. Jala laos hamu ma namasiaturan. Botima!”
Dung sidung sian horong ni hula-hula pasahathon angka ulos holong jala somalna hula-hula ma parpudi songon panggomgom, diujungi ma dohot hata pasu-pasu. Langsung ma nasida mulak.
🙂 Parsinabung ni Parboru: (mandok tu horong ni hula-hulana)
“Mauliate! Malambok pusu hami di sude pambahenan muna rajanami. Mauliatema di hamu. Asa songon hata ni natua-tua ma dohononnami; Marmutik ma inggir-inggir, bulung nai rata-rata. Hata nauli, hata pasu-pasu napinasahat muna i. Na pasauthon ma Amanta Debata.”
🙂 Ditorushon ma muse panghataion.
“Dihamu Raja ni Pamoruonnami, ala sian horongnami dohot sian hula-hula, nunga pasahathon angka ulos holong tu hela dohot borunami, asa hupasahat hami ma tingki on tu hamu.”

Parsinabul ni Paranak:
“Mauliate ma di Raja i.”
🙂 Dipasahat ma muse tingki tu hula-hula dohot tulang ni paranak, jala didok: “Di hamu hula-hulanami, tulang, bona tulang. Molo tung adong nalaho pasahatonmuna tu beremu, hupasahat hami ma tingki on tu hamu. Jala molo suman tu rohamu Rajanami, laos di tingki on ma hamu pasahat pasu-pasu dohot hata gabe. Jadi hamu ma Rajanami namasiaturan. Botima!”
🙂 Dung sidung sian horong ni hula-hula dohot tulang ni paranak pasahathon ulos holong, mulak ma nasida.

Parsinabul ni Paranak:
🙂
Pasahathon hata mauliate tu horong ni hula-hula dohot tulang ni Paranak. Ditorushon ma muse panghataion, jala didok:
“Di hamu hula-hulanami, ala nunga sae be sian horongnami pasahat ulos holong, hupasahat hami ma muse tingkion tu hamu. Hamu ma namangatur.”

Parsinabul ni Parboru:
“Nauli Amangboru. Molo dos rohanta, antar songon on ma nian konsep ni ulaonta na mangihut:
Naparjolo: Marhata sigabe-gabe ma sian hami, hamuma mangampu.
Napaduahon: Mardalan ma olop-olop
Napatoluhon: Mardalan ma ulaon sadari, i ma paulak une.
Paopathon: Tatutup ma di bagasan ende dohot tangiang.

Parsinabul ni Paranak:
“Nunga denggan jala uli be i Rajanami.”

  • 🙂 Dung sidung marhata sigabe-gabe, somalna langsung ma tu hasuhuton. Sada silompa ubi, sada silompa gadong, tung sada pe na pasahathon hata nauli, sude ma dapotan pasu-pasu.
  • 🙂 Di hata sigabe-gabe dohot pangampuon i ma hata mauliate tu sude angka tutur jala pengantin mangampu sian horong ni paranak (Ssuhut paranak penganten).
  • 🙂 Sidung mangampu paranak, dipasahat ma muse tingki tu parboru asa ditutup ulaon i dohot tangiang andorang so ditutup dohot tangiang, mardalan ma olop-olop (paranak dohot parboru pasahat hepeng tu raja parhata na be), jala dung dibagi dua, raja harhata ni parboru pasahathon bagian ni paranak. Dung diolophon 3 (tolu) hali, diparis ma olop olop i tu na torop.

Parsinabul ni Parboru:
“Amangboru, saonari sahatma hita di napadalanhon olop-olop.”

  • 🙂 Dilehon paranak ma tu parboru berupa hepeng recehan, digabung dohot sian parboru, jala dilehon ma muse tu paranak.

“Di hamu amangboru, dohot di hita saluhutna na masihaholongan, ala nunga uli jala renta mardalan ulaonta, di bagasan dame dohot holong namasihaholongan jala dibagasan ni masipaolooloan, asa marolop-olop roha dohot tondinta mandok mauliate tu Tuhanta Pardenggan Basa i. Asa songon hata ni umpasama dohonon:
“Silanlan aek uruk, silanlan aek toba; Nametmet ndang marungut-ungut, namagodang marlas ni roha.”
“Binanga ni Sihombing binongkak ni tarabunga; Tu sanggar ma amporik, tu lubang ma satua; Sinur ma pinahan, gabe nataula.”
“Asa hariarama bonana, hariara nang bulungna; Gabe jala horas hula-hulana, songoni nang boruna.”
“Sahat solu sahat tu bantean. Nunga denggan marujung ulaonta. Sahat ma hita saluhut tu parhorasan Sahat tu panggabean.”
“Taolophon ma tolu hali.”
Didok natorop i ma; “olop-olop” (tolu hali).
Laos pintor dibagi ma hepeng olop-olop tu natorop i.

🙂 Pada umumna di Jakarta, ditingki pesta unjuk (pesta perkawinan nungnga dipasada ulaon marhata sinamot dohot ulaon sadari (maningkir tangga dohot paulak une). Di na laho mulak paranak, parboru paulak jual ni paranak namarisi indahan dohot dengke.

Parsinabul ni Parboru:
“Di hamu raja ni pamoruonnami, ala naung dos rohanta, saonari ma taulahon ulaon sadari.”

PRA:

“Nauli rajanami.”

Paulak Une/Maningkir tangga.

Molo didok Paulak Une:

🙂 Dung hira-hira 7 (pitu) ari boru muli dibagas ni simatuana, paranak rap dohot parumaenna borhat tu huta ni hula-hulana (parboru), digoari ma i mebat manang paulak une. Dipatupa paranak do sipanganon laho pasahatonna tu parboru. Songon i sian parboru, dipatupa do dekke dohot boras sipir ni tondi sipasahaton-na tu paranak. Ima boanon nasida tu bagas na be.

Molo didok Maningkir tangga:

  • 🙂 Parboru borhat tu huta ni paranak, mamboan boras sipir ni tondi dohot dengke, paranak patupa sipanganon, somal do diulaonon mardalan upa panaru didok, napinasahat ni paranak tu boru ni parboru, suang songon i molo adong angka hepeng pasituak natonggi sian paranak tu natua-tua ni parboru.

Di Ulaon sadari hira songononma:

  • 🙂 Diparade paranak ma tudu-tudu ni sipanganon sipasahatonna tu parboru. Suang songon i nang parboru, diparade ma dekke, boras sipir ni tondi. Jala nunga masa saonari diparade parboru lampet di tandok si pasahatonna tu paranak. Dipasahat ma i tu hasahatanna.
  • 🙂 Dipasahat (ditaruhon) parboru ma boru muli tu paranak, jala diparade paranak ma songon upa panaru tu pariban ni boru muli, songon i masituak natonggi tu natua-tua ni parboru.
  • 🙂 Dung singkop jala renta mardalan sude na i ditutup ma dohot ende dohot tangiang naniuluhon ni pihak parboru. Gabe ma jala horas!
  • 🙂 Hira songon i ma rumang dohot ruhut ni ulaon di namarhata sinamot dohot pesta unjuk nasomal. Godang dope angka na hurang manang lupa rumang dohot ruhut-ruhut paradaton, alai pos roha di hita saluhutna, marboha bahenon hita di angka nahurang malo dope hami, lumobi ma i di angka hata pandohanna so haru pas di rohanta.
  • 🙂 Na porlu sibotoon dohot siingoton di ulaon adat paradaton ulaon sadari i ma paulak une manang maningkir tangga i ma:
    • Molo ulaon alap jual (ulaon di parboru) ulaon sadari digoari ma i paulak une,
    • Molo ulaon taruhon jual (ulaon di paranak) ulaon sadari digoari ma i maningkir tangga.

Notabene:

  1. Masa muse taida di ulaon pesta unjuk diparade pihak parboru dohot paranak, na nidok Jambar Tataring (Amplop parpudi). I ma berupa hepeng laho sipasahatonna tu angka dongan tubuna be, angka natuatua namandohoti ulaon i sahat tu na simpul. Taringot di bilanganna, saguru tu hasuhuton ma i. Alai, somalna dibagi ma jambar tataring i andorang so mardalan ulaon sadari. Angka na uli ma i molo sian dos ni roha.
  2. Molo tu angka horong ni hula-hula, sian pihak paranak manang hula-hula ni parboru, na pasahathon ulos holong tu pengantin, dilehon do songon pasituak-natonggi nasida dung sae pasahathon ulos i. Angka nauli ma i tutu. Alai, adong deba na so mangulahon i ala nungnga dipasada di tingki na pasahathon upa tulang. Alai molo boi nian, asing ma tabahen jambar ni hula-hula, tulang, asing muse masituaknatonggi nasida. Aek godang aek laut, dos ni roha sibahen na saut.

Referensi & Daftar Pustaka:

  1. Jambar Hata, T.M Sihombing, CV Tulus Jaya
  2. Dalihan Natolu Nilai Budaya Suku Batak, Drs. DJ Gultom Rajamarpodang, CV Armada –Medan
  3. Situs https://simarmata.or.id/
  4. Situs Partungkoan  https://tanobatak.wordpress.com
  5. https://www.obatak.id/
  6. Situs https://www.tobatabo.com/
  7. Literatur lain dan angka panuturion nu angka natua-tua.