MAMINTA GONDANG

Maminta gondang, sada ruhut na mansai arga do i di adat Batak. Sude halak siulahon adat, ingkon jumpang tingkina di arina maminta gondang uju adong horja na dipatongam marhite gondang sabangunan. Dison pinatudu ruhut maminta gondang na nienet sian pandohan ni angka natua-tua sian surat naung digurithon nasida di internet ima taringot tata bahasa maminta gondang. Diumpamahon panggurit dison namangidohon gondang ima Pomparan Raja Simataniari Sianturi Boru Dohot Berena.

GONDANG-DAN-PANDUAN-MAMINTA-GONDANGUnduh
  1. Gondang Mulamula
    • Tangan do botohon, ujungna jarijari, Jarijari sampulu marsiganjangganjangi. Jonjong hami dison, jumolo marsantabi, Santabi di amanta raja, santabi di inanta soripada.
    • On pe nuaeng amang parogung oloan, panggora sungkot di langit, parsoara tandos tu tano, pargonsi sitombus dolok, parpanangar na gok di rura, partaganing parunung-unung, parsarune parende-ende, partarias namalo.
    • Alualuhon ma jolo tu Ompunta Mulajadi, Sitompa Hasiangan, Sigomgom Parluhutan, Silehon Aek Na Tio, asa tangkas na di banua.
      • (dialualuhon pargonsi)
    • Alualuhon ma muse tu sahala ni amanta raja, raja na hot di adat, raja na ingot di uhum, sitiop parpatihon dohot sitiop hatian.
      • (dialualuhon pargonsi)
    • Alualuhon ma muse tu badia ni inanta soripada mulia, ina parorot, ina batak mardinding, ina batak marparapara.
      • (dialualuhon pargonsi)
    • Ia nunga dialualuhon hamuna i, amang pargonsinami, ai marmula do hagabeon, marmula do hasangapon marmula nang hatuaon. Tamba ni naung adong i sipasahaton ni Tuhanta i tu hami Hasuhuton on.
    • Gorga ni jabu ruma, binuat batu hula. Manortor hami nuaeng dison, bahen hamu ma jolo Gondang Mulamula.
    • Asa bahen damang ma Gondang Mulamula i. (Huhut dilehon pamintaan) Tangkas ma bahen damang…!
      • (gondang mulamula)
  2. Gondang Sombasomba
    • Mauliate nungnga dibaen damang Gondang Mulamula i. Amang Panggual Pargonsi, Amang Pangoloi, Amang Sioloan, parindahan na suksuk parlompan na tabo. Nuaeng marpungu hami Hasuhuton di jolo ni jabu na marampang na marjual on, jabu sibaganding tua panjaloan sangap dohot tua sian Amanta Debata Pardenggan Basa i, huhut jonjong di tonga ni alaman on amparan na bidang, marsada ni roha sahata saoloan mangadopi ulaon on.
    • Nuaeng pe, asa marsomba hami tu Amanta Mula Jadi Nabolon na tumompa langit dohot tano dohot nasa isina. Jala asa marsomba hami tu akka harajaon na adong dihuta on, dohot tu siloloan na torop dohot rajani hula-hula nami. Asa bahen damang ma Gondang Sombai.
  3. Sapur Marmeme
    • Mauliate nungnga dibaen damang Gondang Sombasomba i. Asa songon nidok ni umpasa; Rintar songon bonang di gala, Tio songon mata ni mual, Jumpang na jinalahan, Tarida na niluluan.
    • Asa bahen damang ma, Sampur Marmeme i.
  4. Gondang Simonangmonang
    • Mauliate nungnga dibaen damang Sampur Marmeme i. Asa tinoto ni ulaon on, dapot hamonangan, mandopang hahijangon, asa andar parsaulian di hami Pomparan Raja Simataniari Sianturi Boru Dohot Berena na on jala tongam di tongani mangajana.
    • Asa bahen damang ma, Gondang Simonangmonang i, asa mangaliat hami.
      • (Ditortor na mangaliat on adong do na mangulahon 3 hali, 5 hali, manang 7 hali marhaliang. Dung salpu i ma muse mulak tu inganan parjongjongna hian).
  5. Gondang Sampur Marorot
    • Ia nunga dibahen hamu Gondang Simonangmonang i, jala nunga mangaliat hami, liat ni hagabeon ma i, liat ni parhorasan, manjalahi hamonangan, di di hami Pomparan Raja Simataniari Sianturi Boru Dohot Berena na on rodi situan natorop, na humaliang na lumolo.
    • Sai anggiat ma tinoto ni ulaon on, papitahon nauli, mandimposi na denggan, pinarorot ni adat sian paradatan, pinarorot ni uhum sian paruhuman, pinarorot ni patik sian parpatihan.
    • On pe nuaeng pargonsi, Asa bahen damang ma Godang Sampur Marorot i.
  6. Gondang Didang-didang
    • Ia nunga dibahen hamuna Gondang Sampur Marorot i, sai pinarorot ni adat ma tutu, pinarorot ni patik dohot uhum, saluhut hasuhuton on dohot nahumaliang.
    • Tuhanta ma na masumasu hita, dohot mandidangdidang sude Pomparan Raja Simataniari Sianturi Boru Dohot Berena na on, asa rap mandidang sahala ni amanta raja, dohot badia ni inanta soripada mulia.
    • Asa bahen damang ma Gondang Didangdidang i.
  7. Gondang Sitiotio dohot Hasahatan
    • Pininta ni ulaon Horja on anggiat ma songon hata ni sijolojolo tubu: Marsiaminaminan songon lampak ni gaol, Marsitungkoltungkolan songon suhat di robean. Mangulahon dibagasan sada pangkilaan, asa marjunjungan songon dolok, martanda songon dalan, jumpang na jinalahan, tarida na niluluan.
    • Las ma dingin-dingin, las ginolomgolom, Horas ma tondi jala madingin, Tuhanta ma na manggomgom.
    • Martantan ma baringin, mardangka hariara, Matorop maribur ma Pomparan Raja Simataniari Sianturi Boru Dohot Berena na tu joloanon. Matangkang majuara.
    • Sitongka ma di hita nasambar parnidaan, sitongka ma nipi nahalobuan, sitongka ma bala ni naniula, sitongka ma sahitsahit tu jolma.
    • Sai sipatiur na dijuluan ma, jala sipatio na dijaean, di saluhut Pomparan na.
    • Sahat-sahat ni solu ma, sahat tu bontean, Sai sahat ma Pomparan Raja Simataniari Sianturi Boru Dohot Berena na on saluhutna, sahat gabe, sahat horas. Sahat ma nauli, sahat ma na denggan hasahatan ni tortornami, Asa bahen damang ma Gondang Sitiotio dohot Hasahatan.
  • Partungkoan:
    • Di loloan partungkoan rap dohot natuatua dohot panangkasion sian angka pargonsi, dang dung hea masa nahinan adong padomu-domu gondang songon pamintaon namasa saonari.
    • Tabege angka sipinta gondang saonari mandok : Amang panggual pargonsi, bahen hamu ma gondang mulamula, padomu tu gondang somba, padomu tu sampur marorot, padomu tu …. dohot tu hasahatan. Gondang napulpal do didok gondang sisongon i.
    • Jotjot do masa tarida di angka ulaon nuaeng, tutur do nasida, didok tu pargonsi, aluaaluhon hamu jolo tu … dohot tu … ganup panortor sai mangido “gondang hasahatan padomu tu sitiotio”
    • Pargonsi namatua mandok, molo so tangkas dipangido panortor, olo do pargonsi mangalusi “patangkas hamu pangidoan mu”. Suang songon i do nang tu pargonsi molo so diboto gondang pangidoan ni panortor olo do panortor i mandok “patangkas hamu jolo”.
    • Ingkon malo do pargonsi mangalapati hata pangidoan ni panortor, ipe asa dibahen gondangna. Olo do panortor namalo mangidohon goar ni gondang sitortoranna. Lapatanna, dung didok hatana, “gondang … ma bahen hamu” ninna.
    • Molo tung sada gondang pe sitortoran, boi do hatahonon angka hata pasupasu mardongan umpasa alai dirimpun ma gondangna sada. Boi do pangidoon goar ni gondang i, alai boi do dohonon tu pargonsi asa nasida manontuhon, atik so haru tangkas diboto panortor goar ni gondang i. Molo hurang singkop, boi do sundatan asa disingkati gondang i.
    • Asing do gondang sitio-tio tu gondang hasahatan. Humatop do urdot ni gondang sitio-tio tu gondang hasahatan.
    • Pangidoan “hata pangalualuan/alualu” hasurungan ni suhut rap dohot raja do i uju mamuhai ulaon. Gondang Mulamula pe uju mamuhai gondang do i dipangido raja rap dohot suhut. Ia gondang Hasahatan uju manggogi ulaon do i, tingki raja mananti ulaon panggohi.
    • Hasomalan ni panortor nahinan uju manggohi panortoronna dodok ma ; “Hasahatan ni tortornami, bahen ma gondang sitio-tio”. Jadi tangkas do dang didok “padomu ma gondang hasahatan tu sitiotio”
    • Uju panortoron, holan pargonsi nama dongan masisisean, ai nunga tumimbo ibana sian saluhut natorop dohot sian raja. Raja pe uju manortor ingkon disise do pargonsi. Ima dalanna didok nasida “bataraguru humundul” ai dipansa dohot di halang gordang ni ruma do nasida hundul. Holan uju Raja Sisingamangaraja do manortor dang marpansa pargonsi.
    • Adong do ragam pandohan pangidoan gondang Sampur Marmeme dohot Sampur Marorot. Nadeba mandok Saudara Marorot dohot Sampuara Marorot, Sampuara Marmeme.
    • Adong do lapatan naasing sian hata sampur, ima namandok “sirnip”, mangaleap sian bibir ni hudon, adong mangalapati mardomu. Hata mardomu “sampur” pe adong do tu lapatan ni “bersenggama”.

Sumber Artikel: https://tanobatak.wordpress.com/2007/11/30/maminta-gondang/

Naringkot siingoton

Porlu dope hita manggali kebudayaan i marhite manjaha buku dohot mambahen penelitian asa taantusi tangkas ruhut-ruhut ni kebudayaan i lumobi Hata Batak.

Molo marumpasa (mamasu-masu) denggan do jouonta goar ni Tuhan anggiat sahat pasu-pasunai, Jala asa tarida muse inkulturasi ni ugamontai.

Sude halak na marumpasa ingkon botoonta do unsur-unsur anatomi ni umpasa i asa boi partanggungjawab honors to umum lumobi to na umposo.

Sae ma/paling godang pasu-pasu i 3 (tolu), alai ingkon umpasa na tingkos. Unang pola Laos sude pinaharuar gate mubajir huhut muse ndang memenuhi syarat. Asing Umpasa asing do Umpama.

Panimpuli/ Parpudi

On dope na boi tarnasahat hami sian panggurit tu tonga tonganta. Tung godang dope hahuranganna, jala naingkon sipauli-ulihononta tujoloanon. Alai na boi masuk tu rohanta dohot tu pingkiranta boi ta bahen I gabe parbinotoan jala siulahonon dungi sikembangkononta.

PEDOMAN

  • HOT DI DALIHAN NATOLU
  • ASING LUAT ASING ADATNA
  • SIDAPOT SOLUP NARO
  • AEK GODANG TU AKE LAUT, DOS NI ROHA SIBAEN NA SAUT BALINTANG MA PAGABE TU MONDALHON SITADOAN, ARI NAMARULAON DO GABE MOLO DUNG MARSIPAOLO OLOAN.