MARTONGGO RAJA
Molo modding sasahalak sian sada keluarga, dipatupa do pangarapoton naniulahon ni 3 unsur Dalihan Na Tolu nalaho manjalo paniroion sian horong ni hula-hula, tulang, tulang rorobot dohot bona niari ni namodding i, sian hasil ni pangarapoton i ma dapot kesepakatan goar ni ulaon adat sipatupaon nahombar tusi. Adong do tata cara khusus tu ulaon martonggo raja na boi siparsiajaranta muse.
TU NA MATE ALANG (MATE MAKKAR)
Molo monding (marujung ngolu) sada ama, holan maranak dohot marboru dope, manang tu naung sohot lanakkonna alai dang adong dope pahompu (baca: pahoppu) na di goari dopei matipul ulu, alai molo ina do na monding (baca: modding) i digoari mai tompas (baca: toppas) tataring.
Ia paradaton tusi saput ma dohot tujung, molo ama do na monding i tulangni na monding i ma mambahen saput na, alai molo tujung na hula-hulana ma na mangalehon i.
Alai molo ina do na monding i mambahen saput na ima hula-hulana, alai mambahen tujung na tulang ni namabalu ima (tulang ni suamina).
Ia paradaton na hobbar tu si di goari mai mangido tangiang, jala sebenarna ulaon i ulaon dijabu mai, ai dang boi dope maralaman na toppas tataring, manang natipul ulu, alai dung sikkop dipature na monding i tu udean, di panakkok do hulahula nai dohot tulangna tu tongani bagas ni na monding i digoari mai mangukkap tujung/mambukka tujung.
Ia isaranai na mangido tangiang, setiap na mandok hata jongjong ma marpiga-piga halak, sada ma mambaen tamiang, sada ma maddokkon hata soso-soso, manang apul-apul, songon ima setiap rombongan na mandok hata, dimulai ma mandok hatai sian paidua ni suhut dongan tubu, boru, bere, ibebere, pariban/ale-ale, dongan sahuta/STM, natua-tua hombar balok /natua-tua na ro, dungi sibaen saput /hula-hula (tulang), paampuhon ma tu hasuhuton. Alaimolo ina do na monding i hula-hulana do na paampuhon, alai molo ama do na monding i tulangna do na paampuhon, dang adong di ulaon nasongoni ria raja manang pangarapoton, dungi mangampu ma hasuhuton.
NAUNG SARI MATUA
Molo monding sada natua-tua naung marpahoppu sian anak, marpahoppu sian boru, alai adong do pe ianakkanna na so marhasohotan di goari mai na sari matua, ia tangan ni namonding sari matua dang boi dope mangembal. olo do dibaen dua ari manang tolu ari di jabu, molo jumpang dosni tahi di hasuhuton lao patuat na sari matua i, di pamasa ma ulaon ria raja manang pangarapoton dijou ma akka na hombar tusi: Hula-hula, tulang, bona tulang, bonani ari, tulang rorobot,pariban/ale-ale, dongan saulaon, songoni ma nang natua-tuani huta nang dongan tubu, boru, bere, ibebere.
Diulaon pangarapotoni di buat ma parjuhutan na marmiak-miak godang na sesuai dohot godang ni undangan ni hasuhuton i.
Dung ris sude ro ontangan nai/nanigokkon nai, di pukka ma pakkataion, jumolo ma marsipanganon, laos di bagi ma nang dohot akka parjambaron, sahat do parjambaran i tu bonani ari, bona tulang, tulang rorobot, tulang hula-hula, hula-hula ni suhut namar haha maranggi, hula-hula naposo, songoni nang akka simatua niboru, pariban, nang ale-ale/dongan saulaon, pemerintah setempat, nang dohot tu huria. Songoni pardalanni parjabbaron di tikki pangarapoton manang ria raja, songoni ma nang dohot di ari hapartuaon nai.
Las dipangarapoton ido/ria raja di somba akka hula-hulana nang dohot tulangna jala laos di saur-sauri akka na margoar hula-hula dohot na tua-tuani huta maniroi ulaon i, asa tung denggan,dung i di paampuhon ma tu suhut, ia na paampuhon i, saguru dina sari matua ido, molo ina do na sari matuai hula-hulana na ma na paampuhon, alai molo ama do na sari matuai tulang na ma na paampuhon, jala menurut na biasa borngin do di baen mangampu tu ruma-rumana, alani ido umbahenna didok natua-tua mamodai ianakkonna “ait dia sadihari bot mataniari di au anak hasian, dohot hamu akka borukku”.
Jadi lapatanna molo nunga natua-tua naung sari matua manang na saur matua marujung ngolu digoari mai naung bot mataniari di namonding i manang na marradian i, dung sikkop sude hombar tu pangarapotoni mangampu ma suhut.
Dung jumpang manogot nai sesuai dohot pakkataion manang pangarapoton di tonggo raja manang ria raja, diulahon ma ulaon, molo parhobas makkobasi sipanganoni molo namarmiak-miak do dimulai mai jam opat manang jam lima pagi. Alai molo sigagat duhut doi mulai ma marhobas jam sada manang jam dua, dung dapot waktuna sesuai dohot hasil ni pangarapoton maralaman ma natua-tuai.
Na biasa dibaen do disi songon gantini gondang ima musik, na deba laos olodo mambuat gondang sabangunan, parjolo do hasuhuton, dohot akka dongantubuna lao manortor dung salpui masuk ma rombonganni hula-hula mamboan eme tubbur/eme na martuddu laos dohot parbue pir (sipirni toddi) songoni dohot akka ulos sappe tua (ulos pasu-pasu) dipasahat mai marhite tor-tor.
Dung salpu hula-hula masuk, masuk ma robbonganni tulang, dungi robbongan niboru tulang, dung salpu i, rombonganni bonaniari, dungi rombongan nibona hula-hula na mar haha maranggi, sude rombongan ni hula-hula naposo, dungi rombonganni pariban/ale-ale, natua-tua, hombar balok, dung salpui masuk ma akka robbongan na marliat-liat.
Molo tung adong rombonganni akka dongan saulaon, parpudima rombonganni dongan sahuta, alai ianggo na pasahat ulos gabe-gabe/sappe tua, holan akka namar goar hula-hula do na pasahatton ulos i. Molo rombonganni tulang rorobot olo do sipata rappak dohot hula-hula (tulang) alai olo do sipata pulik rombonganni tulang rorobot.
Ia lapatanni eme luddu/eme tubbur asa martumbur ma akka pasu-pasu dobot panggabean parhorasan tu pinoppar ni nasari matuai, ia dung sikkop sude di paampuhon hula-hula manang tulang na ma tu hasuhuton bolon, barupe di pataruma na sari matuai tu inganan parsatokkinan manang tu tambak na timbo, alai molo hula-hula dohot tulang di panakkok dopei tu jabu, ima di goari mangukkap hombung ia na mangukkap hombung saguru tuna sari matua ido. Ia molo ama do nasari matuai tulangna ma namangungkap hombung laos manjalo mano-mano, hula-hulana ma manjalo daon sihol, alai molo ina do nasari matuai hula-hula na do siukkap hombung tulang ni amatta ima manang na mangaiar nasari matua ima manjalo daon sihol, ima molo ulaon tu na sari matua.
NAUNG SAUR MATUA
Molo dung saur matua sada natua-tua, mangembal nama ia tanganna. Ia na saur matua adong do tolu macam:
Sada: Natua-tua saur matua ama/ina gellengna sude nunga marhasohotan, alai dang dope marnini marnono. Molo holan saur matua do boi do holan na marmiak-miak manang lobbu sitio-tio pasae ari-arina manang partangianganna
Dua: Gelleng na sude nunga marsohotan jala nunga marnini marnono. Molo nasaur matua huhut marnini marnono lobbu sitio-tio manang horbo ma pasae ari-arini natua-tuai manang partangianganna.
Tolu: Nunga sahat sude gelleng na sahat tu na marnini marnono jala adong dope nasahat tu na mar oddok-oddok. Jala dang adong sitaonon di akka pinoppar na di goari mai saur matua huhut mauli bulung. Molo saur matua huhut mauli bulung sirsir sude ianakkonna dohot pohoppuna songoni sahat tu oddok-oddokna jala boi sibahenon di akka popparanna digoari mai mangaliddakkon nagok, jala parjuhut na pe disi manang partamiangan sipatupaon ni pinopparna digoari mai gaja toba (horbo limak kai manang horbo sisapang na ualu) jala di bahen doi marborotan jolo di liatton do horboi tolu liat/pitu liat, jala olo do di jabu nasaur matuai Sappe pitu ari pitu borngin, Setiap borngin di pamasa do iddahan ni paddungoi saguru tu siha adongon ni popparanna. Jala horbo si limakkaei ima horbo na ubbalga alani balgana doi ubbaen na di goari horbo si limakkae, Jala tung massai sangap do disi dibaen hula-hulana dohot tulang na sahat tu bona tulang, bona ni ari, tulang rorobot, hula-hula na marhaha maranggi. Jala par jambaran pe disi mar passa nama di goari, Laos sian passa ima di passapatton parjabbaroni, ido umbaen na di goari na mangaliddokkon nagok. Jala ulos sapot dang adong be disi, ulos sappe tua nama goar na passappehon panggabean parhorasan tu akka popparanna. Jala ulos saput digatti mai, ima goar na tutup batang, Jala ulosi di goari mai ulos puccak/ragi hidup ala i na ma puccak ni hatuaon ni jolma.
Alai marbeda do partuaon ni ama tumimbo doi satingkat sian par tuaon ni ina. Jala molo akka na saur matua tikki di ngoluna manjalo ulos matua doi sian tulangna dohot sian hula-hulana. Alai molo adat di Toba holbung, di Porsea/Balige di patupa ma sulang-sulang so hariapan.
Alai adong do olo pangidoanni na tua-tua tu akka ianakkonna. Di tikki di ngoluna di gelar adat na, adat pasae ari-arina Jadi molo nungnga matua, holan adat manambat na ma di baen pomparanna. Alai adong do sa saotik beda-bedani paradaton i marguru tu luat na be, ai nunga marserak pomparanni oppunta tu desa na ualu. Ido ubbaen na adong umpasa bataki, mandok songon on:
“Asing dolok – Asing do duhutna; Asing luat – Asing do adatna”
“Di si paccur – Di si do paridian; Di si tandok – Di si do parsuhatan; Di si luat – Di sido paradatan”
Dang boi hita martahan di akka paradattotta lumobi ma hita akka naung di tano parserahan, Alana marhata nitta do akka siulaon, dang boi marhata nikku alana ikkon marsipasangap-sangapan do.
“Tappak na do tajom na – Rim ni tahi do gogona”
“Gaja pe pinagaja-gaja – Duhut-duhut si panganonna; Hata pe pina hata-hata – Sa guru di suhut do ulaonna”
“Si naddehon ma sige – Tu bukkulanni sopo; Denggan do iba manise – Nang pe naung takkas binoto.”
Dung matua sada natua-tua ama manang ina di paboa mai tu dongan sahuta, tu hula-hulana, tu tulangna, tu tulang rorobotna, tu bona tulang, dohot tu bona ni arina, songoni nang tu pariban, ale-ale, dongan saulaon, lumobi mai tu pangula ni huria, sahat tu natua-tua hombar balok. Jala torusdo dianggapi saleleng di jabu dope na saur matuai, Dung jumpang ari lao partuatna jumolo ma di pamompo na tua-tuai tu ruma-rumana. Biasana di bot ni ari do di patupa ulaon na songon tu na saur matua.
Parpeak ni batang
Di Jabu: Ingkon ungkur tondonghon tiang partonga-tonga ni jabu ma simanjujungna, (sari matua manang saur matua), alai molo poso dope na monding i atik pe naung marpahompu ndang ungkur simanjujungna tu tiang jabu bona alai hombar tu tiang do.
(Sian parpeak ni na monding i botoon ni paningkir ma naposo manang naung sari matua/saur matua na monding i).
Di Alaman: Ingkon dompak bahal do simanjojak/pat ni na monding, ndang marimbar di siamun manang di hambirangna jabuna. Molo 2 (dua) bahal ni huta i, mandompakhon bahal/harbangan siboluson tu udean ma patna
Mompo (masuk manang bongot)
Hata mompo dipangke tingki mamongoti jabu baru na so hea diingani dope.
Pamasukhon bangke ni natua-tua (sari matua, saur matua) tu ruma-rumana (batangna).
Sijagaron
Sijagaron i ma ampang na marisi eme, sanga-sanga, ompu-ompu (raja ni duhut-duhut) ranting ni jabi jabi manang baringin. Molo naung marpahompu sian anak, marpahompu sian boru na monding i, dipeakhon ma sijagaroni dingkan simanjunjung ni na monding. Molo holan marpahompu sian anak, dingkan siamun ni simanjujung ni na monding i ma hapeahanna, jala molo holan marpahompu sian boru, dingkan hambirang ni simanjujung ni na monding i ma hapeahanna.
Partording ni ulaon na saur matua:
Dungi dipatupa ma tonggo raja ido digoari pangarapotan, roma saluhutna niontangna/undanganna. Dung sahat sude akka na tua-tua dohot sude hula-hula. Sahat mai tu bona ni ari. Saluhutna mai tahe akka na rikkot tu pangarapotani.
Pangarapoton
Tu natuatua naung gabe huhut sari matua manang saur matua do dipamasa ulaon pangarapoton. Paidua ni hasuhuton do raja parhata (dumenggan molo raja parhata i natua-tua jala naung marpahompu).
Na mardongan tubu, boru, dongan sahuta, hula-hula dohot tulang marpungu manghaliangi bangke/na monding. Sai jolo masisungkunan manang masisisean do na mardongan tubu, ise ma raja parhata.
Raja parhata maniop pinggan panungkunan manang pinggan pangarapoton na marisi boras sipir ni tondi, demban (napuran) sirarauruk, ringgit sitio soara.
Raja parhata manungkun tu ianakhon ni na monding manang naung satahi saoloan nasida laho paborhathonna na monding i, pasaehon angka persoalan-persoalan molo adong siselesaihononhon. Dung dialusi baru asa diulahon na mangarapot.
Raja parhata mangatahon hata pangarapoton diuduti dohot manjomput boras sipir ni tondi, parjolo tu simanjujungna, huhut didok pir ma tondingku, sidung i dijomput ma boras sian pinggan i dibahen tu simanjujung pomparan ni na monding.
Parjolo tu anak sihahaan, sidung i tu angka anggina, ibotona, pahompu sian anak ni na monding, pahompu sian boru, tu nini dohot tu nono. Dung sude pomparan ni na monding i manjalo boras sipir ni tondi. Disaburhon raja parhata ma boras dompak ginjang huhut didok horas-horas-horas.
Dipasahat ma sian hepeng, pangarapoton i upa panggabei tu horong hula-hula/tulang, dongan sahuta, dongan tubu, boru, sidung I asa marhata sigabe-gabe jala mangampu ma suhut.
Pengertian Na Mangarapot
Na jolo ndang masa dope suntik songon sinuaeng on. Ala porlu dope bangke i lumeleng di jabu (3, 5, 7 ari), jala asa unang muap, dirapat ma batang i dohot puli (songon lem do i sian tano Hat dohot indahan puti ma di duda, manang sian gula sangka, hapur dohot rihit) tu pardomuan ni angka papan ni batang i asa unang puas angka uap sian bagasanna. Sidung ulaon pangarapoton, mangihut ma adat tu partuatna (maralaman).
Ndang dos sibuaton dipangarapotna dohot dipartuatna. Sai tumimbo do sibuaton dipartuatna sian pangarapotna (molo horbo partuatna, lombu ma pangarapotna, alai molo lombu do partuatna, pinahan lobu ma pangarapotna).
Sipata nunga dipasada pangarapotna dohot partuatna sadari i, ima lombu na tinungtungan. Dung sidung ulaon pangarapoton diuduti ma dohot na marsipanganon, dohot na mambagi perjambaron.
Jumolo ma di baen marsipanganon, laos di padalan do di si akka parjambaran, molo ama do na marujung ngolui tu tulangna ma di pasahat upa suhut alai molo ina do na marujung ngolui tu hula-hulana do di pa sahat upa suhut, Jadi tulang na do marganti-ganti dohot hula-hula manjalo upa suhut dohot osang-osang, molo di tulang upa suhut di hula-hula ma osang-osangna molo di hula-hula upa suhut di tulangna ma osang-osangna.
Molo jambarni bona tulang di pasahat ma sobba parjambarani sian rusukna. Molo digoari sobba tutup doi, dang marsirang rusuk nai. alai molo sobba-sobba bukka doi, dang mardomu ujungni rusuknai, di pasahat ma marsanggulan tu boru, alai molo tu tulang rorobot, di pasahat mai tulang gajjang (soit). Dipasahat ma tong soit tu hula-hula na marhaha maranggi, tu na tua-tua ni huta di pasahat ma na marngingi tu pariban, tu ale-ale, tu hobbar balok, tu pemerintah setempat, tu huria tetangga, tu parhobas, tu natua-tua hobbar balok, hula-hula naposo, sude on si jalo jambar na gok, dung sippul mar sipanganon dohot marbagi parjambaroni di uduti ma pakkataion, jumolo ma i marsirenggetan.
Pasadahon roha hasuhuton asa sada roha nasida mangalusi raja panise. Songoni ma muse raja panise, tong ma marsi renggetan lao pasadahon roha lao manise alai adong do pamasahon na manise on sian natua-tua ni huta, Adong do pamasahon sian dongan tubuna, Adong do pamasahon sian hula-hulana.
Hata ni Raja Panise tu Hasuhuton
Dung dos roha ni na sida jala hasuhutan pe na mardongan tubu nungga sada roha na, makkatai ma raja panise ido manise hasuhuton, songonon ma hatana:
“Makkatai ma hita amang hasuhuton”
Dungi di alusi raja parhata ni hasuhuton ma:
“Baen hamu ma na ulina i raja nami”
Nungga hundul hita nuaeng di lage tiar sai tiar ma panggabean tiarma parhorasan di hamuna suhut nami tu joloanni ari on, alana di jolo jabu na marsangap na martuaon nungnga bosur hami mangan sagat di namarloppan, manggalang tanggo-tanggo na godang manjalo na mar niadopan, sai anggiat ma attong pamurnas tu daging saudara tu bohi si pa lomak ibbulu si paneang holi-holi, asa do honon ma songon ni dokni na tua-tua.
“Asa bagot na marhalto mai – Na tubu di robean; Horas ma hami namanghasagatton si panganon Na pi na sahat mu nai”
Sai tubuma sikkap ni i tu gabena ma hamu suhut nami namangalean.
“Asa saonnari pe suhut nami, dia ma lakkatna dia ma unokna, dia ma hatana dia ma ni dokna si begeon ni pinggol si peoponni roha, asa takkas ma paboa hamu siani Hamu na suhut nami”
Dungi dialusi raja parhatani hasuhutonma;
“Gabema akkupni na horas raja nami, tarsingot ma rajai di na bosur mangan. Raja nami sai gabe ma na ni ula tujolanni arion asa adong muse na laho habosurhonotta, sinur ma na pinahan raja nami asa adong muse nalao hasagattonotta. Raja nami maulipe otik so sadia si panganon na ta hasagatton i paliasma raja nami, ndang alani holit manang alani tois, tung sohu pakke hami do holit maradoppon hamu raja nami, molo tung holit pe sai tarida ma hasilni i tu joloanni arion. Songon ni dokni na tua-tua raja nami”
“Marbaur tanduk – Marbaur holi-holi; Godang si butong-butong – Otik si pirni todi”
“Asa tintin ma natinopa – Golang-golangdo pangarahut na; Tung songonipe natarpatupa – Tu ga bena ma raja nami pinasuna”
Ia hatana panggabean parhorason do raja nami”
Dungi marpanakkasi ma muse raja panise
“Gabe ma tutu akkupni na horas, Panggabean parhorason do hape, sai anggiat ma lam tugabena hamu suhut nami tu joloanni ari on alani i suhut nami.
“Tappakdo songon na huddul – Udur songonna mardalan; Akkup ni nauli akupni na denggan – Asa takkas ma di paboa damang”
Asa dapot songon ni dokni na tua-tua
Takkas uju purba – Tumakkas ma uju akkula; Gabe hita on jala maduma – Tumakkasma jala mamora”
Sitakkas ni nauli sitakkasni na denggan takkas ma pa boa hamu na hasuhuton nami.
Dungi mangalusima muse raja parhatani hasuhuton
Sise ma tutu sise munai raja nami tadda do hamu raja panise,
Hami pe attong paboaon nami ma sitakkasina.
Ia sitakkasna on ma raja nami, di piga-piga ari naung lewat matua dolok ma ama nami/inanami huhut marpahoppu sian anak marpahoppu sian boru, marnini sian anak, marnono sian boru. Jala basa do debata mauli bulung do hami sude pinomparna.
Di siala i rajanami denggan do tahe pangidoon pasu-pasu di partuaonni natua-tua nami on. Alani ido asa hu papungu hami hamu rajani hula-hula, rajani dongan tubu, rajani boru, nang rajani dongan sahuta, pariban nang dohot ale-ale. Ro di sude na marholong ni roha marnida hami, asa ajar-ajari hamu hami raja nami, jala tiroi hamu hami, asa sikkop di partuaonni na tua-tua namion Jala asa pitta diakka pasu-pasu na naeng si jaloon nami sian hamuna hula-hula nami, tulang nami, bona tulang, nang dohot bona ni ari, tulang rorobot, nang dohot sian natua-tuani huta na hu parsangapi hami sian pariban nang ale-ale nami dohot sude tahe na mar holong ni roha na marnida hami, jala laos di son ma raja nami ria raja nang dohot pangarapotonna, ima sitakkasna jala ima haroanna raja nami.
Dungi makkataima muse raja panise:
Gabe ma jala horas amang suhut nami, tadda do patni hoda tu patni gaja, pahoppu ni na mora do hamu jala anak ni raja, di boto hamudo adatni opputta si jolo-jolo tubui. Sai anggiat ma attong di tabbai debata di hamuna pasu-pasu nauli dohot pasu-pasu na denggan.
Asa saonari pe amang suhut nami laos hamu ma na pataddahon tu sude namarliat-liat nalolo. Jadi sesuai dohot boa-boa muna matua dolok na tua-tuai ima oppu … jala mauli bolung di dok roha nami horbo si sapang na ualu ma manang silimakkae. Manang gaja toba ma dipatupa dipartangiangan ni na tua-tua on, jala marpassa nama hamu pasahathon akka parjabbaran nami jala takkas ma pasahat hamu akka parjabbarani tu akka si jalo parjabbaran.
Dungi di alusi raja parsautni hasuhotonima
“Naolo do hami tiro-tiroan muna mambaen tu nadumenggan.”
Asa di tontuhon do arina manang jam piga marsogot na i maralaman jala dung sikkop sude mangalean panuturion dohot akka pasu-pasu namarliat-liat, di paampuhon tulang/hula-hula ma tu hasuhuton bona. Laos di na mangappui hasuhuton i dipaboa ma lao parnakokni hula-hula dohot tulang tu jabu.
Dung sikkop marsogot di pataru na saur matuai tu dolok-dolok natibbo jala laos di pangarapotan ido di paboa akka na margoar hula-hula manang na piga ulos na lao siappehonon ni nasida setiap robbonganni akka hula-hula, jala di pangarapotoni do di paboa parsaut ni hasuhuton mambaen gondang manang musik. Dung dapot jam na naung dittotuhon jumolo do hasuhuton manortor huhut makkaliangi na saur matua i. Laos makkutti raja ni duhut-duhut dohot akka si jagaron, mangihut do disi raja ni duhut-duhut.
Dung sikkop manortori sude popparanna di jabu, baru pe di boan ma maralaman dungi di jalo haroroni hula-hula, tulang, bona tulang, bona ni ari, tulang rorobot.
Marsipanganon ma hira-hira jam sada manang jam dua, dung salpu mar sipanganon di uduti uduranni hula-hula na marhaha maranggi, hula-hula na poso, pariban dohot ale-ale, pangonggom do ianggo natua-tua ni huta.
Hasuhuton mangido tumpak sian dongan tubu, boru bere, dongan sahuta, ale-ale (Hasuhuton mandok hata mauliate ditumpak na jinalo nasida) Mandok hata pasu-pasu, hata sigabe-gabe horong hula-hula dohot tulang.
Dung sikkop sude dohot natua-tua hobbar balok, tulang/hula-hula ima na pa appuhon. dung sidung i mangampu ma suhut, dung sidung i dipataruma na saur matuai tu dolok-dolok na timbo. Ima sahatna.
Goar-goar ni parjambaran sian pinahan lobu
- Osang-osang
- Namar ngingi, dua
- Namarsanggulan dohot gaorgota panahui
- Panamboli/ujung piso
- Bunion tondi
- Somba
- Somba-somba
- Soit, dua
- Botohon, dua
- Rossangan
- Rippusu/ate-ate, butuha raja, limpa
- Tanggo-tanggo na godang/juhut na saur
- Upa suhut/ihur-ihur
Alai molo tu ulaon nasaor matua ditambai ma dua sasap.
Referensi & Daftar Pustaka:
- Jambar Hata, T.M Sihombing, CV Tulus Jaya
- Dalihan Natolu Nilai Budaya Suku Batak, Drs. DJ Gultom Rajamarpodang, CV Armada –Medan
- Situs https://simarmata.or.id/
- Situs Partungkoan https://tanobatak.wordpress.com
- https://www.obatak.id/
- Situs https://www.tobatabo.com/
- Literatur lain dan angka panuturion nu angka natua-tua.