Kata Sambutan. II

Menyapa seluruh peserta rapat dari Pemerhati / Sesepuh:
Oleh Kornel P. Sianturi
Horas ma di hita saluhut na…
Dihamu damang dainang haha anggi nang pinaribot iboto dohot lae nami pinompar ni Ompu ta Simatupang; Sianturi; Simataniari namarpungu ditikkion namaringanan di luat na be (Sumatera, Jawa, Kalimantan, Sulawesi dohot luat na asing naso boi hugoari hami).
Nang di hamu dongan tubu nami amang Jaurat Sianturi (Op Hailye Emma Sianturi) songon Korwil USA manang Amerika Serikat dohot amang Morris Patar Sianturi na tinggal di California Amerika Serikat songoni nang iboto nami Berlianta Ria Mollenaar Simatupang na tinggal di Amsterdam Netherland, Horas ma dihamu na sasude.
Parjolo hita mandok mauliate tu Tuhan Jesus ala dilehon dihita hahipason gabe boi marpungu ditikkion jala pajumpang marhite perangkat elektronik (Virtual Zoom Meeting).
Dihamu damang dainang haha anggi nang pinaribot iboto dohot lae nami pinompar ni Ompu ta Simatupang; Sianturi; Simataniari, sian hami pemerhati / sesepuh jala songon sian iba sandiri na mewakili; Kornel P. Sianturi; disiala haradeon muna mandohoti parpunguanta ditikkion, tama do dohonon mauliate ma tu hamuna saluhutna ala diharadeon ni rohamu mandohoti acara ta sadarion.
Tuhan Yesus Kristus mangiring – iring hita jala na mangalehon hahipason dohot ganjang ni umur tu hita ganup marsada -sada, asa boi hita pajumpa di tikki nanaeng ro dibagasan hahipason.
Pangidoan nami tu hita saluhutna pinompar ni Ompu ta Simatupang; Sianturi; Simataniari sai martamba tamba di hita hasadaon n iroha, songon hat ani situa – tua namandok;
Marsiamin – aminan songon lappak ni gaol; Marsitukkol tukkolan songon suhat dirobean.
On ma nagabe ojahan dihita sadarion asa dapot dos niroha jala asa lam martamba – tamba ma pasu pasu dapoton ta tujoloanon.
Songoni ma hata patujolo songon sambutan sian hami pemerhati. Tuhan ma na manggonggomi sian namamuhai, diparsitongaan ro dinamangujungi pangarapoton parpunguanta ditikkion.
Selamat ma tu hita saluhut na partahi saoloan na laho manontuhon ise na laho songon uluanta tu joloanon na gabe Ketua Umum Sedunia.
Songon tambahan; mauliate do pasahaton tu amang Batara Sianturi na paradehon media zoom na tapakke saonari on naboi papunguhon hita sampe 500 halak.
Sai mattak pasu – pasu ma on tu hita tarlumobi tu amang Batara Sianturi. Atik boha adong hata nahurang lobi parjolo hami mangido ma’af. Horas ma dihita saluhut na.